Sekretari i Përgjithshëm i “Shqipëria Bëhet”, Elton Laska i është përgjigjur kryeministrit Edi Rama i cili deklaroi se partitë e reja i kanë mbushur me familjarë.
Gjatë një reagimi në rrjetet sociale, Laska i drejtohet Ramës se më mirë partia është me familjarë që nuk ka precedentë penalë sesa me kriminelë siç vepron Partia Socialiste.
Laska thotë se Rama nuk duhet të bëjë moral pasi ka aktualisht 36 kryetarë bashkie që paraqiten rregullisht në SPAK, si dhe disa ish-ministra apo deputetë të dënuar.
“Zoti Rama, listat i mbushëm me familjarë, jo me kriminelë siç bën ti!
Kreu i një qeverie që në listat e kandidatëve për deputetë ka futur të dënuar për trafik droge dhe përdhunues, për të cilët u bë ligji i dekriminalizimit, po na kritikon ne, partitë e reja, se kemi futur në lista familjarët tanë.
Ky që flet për përfaqësim ka aktualisht 36 kryetarë bashkie që paraqiten rregullisht në SPAK, si dhe disa ish-ministra apo deputetë të dënuar.
Së pari, asnjë nga familjarët tanë nuk ka precedentë penalë, ndryshe nga përfaqësuesit e tu politikë.
Kur ti flet për përfaqësim politik, në mendje më vijnë Veliaj, Ahmetaj, Bllako, Koka, Roshi dhe të tjerë që sot po përballen me ligjin.
Ti, si askush tjetër, e ekspozove politikën dhe ekonominë përballë krimit dhe korrupsionit. Prandaj, ky sistem duhet shembur me çdo kusht!”, shkruan Laska.
