Kryeministri Edi Rama deklaroi këtë të martë, gjatë Konferencës së IX Ndërqeveritare për mbylljen e tre grupkapitujve të tjerë të negociatave për anëtarësimin e Shqipërisë në Bashkimin Europian, se qeveria e tij po afron “standardet europiane” për qytetarët shqiptarë.
Në fjalën e mbajtur në Bruksel, Rama e cilësoi mbylljen e grupkapitujve si një tjetër “gur kilometrik” në rrugëtimin e Shqipërisë drejt BE-së, duke theksuar se reformat po japin rezultate dhe se vendi po ndërton Shqipërinë që synon të bëhet pjesë e familjes europiane.
Megjithatë, premtimi për “standardet europiane” është një mesazh që kryeministri e ka përsëritur në pothuajse çdo fushatë elektorale dhe në daljet e tij publike ndër vite.
Ndërkohë, deklaratat e tij vijnë në një moment kur pakënaqësia qytetare ndaj qeverisë vazhdon të shfaqet në protesta të përditshme.
Prej 45 ditësh me radhë, qytetarë kanë protestuar kundër qeverisë së Edi Ramës, fillimisht për projektin e resortit luksoz në një zonë të mbrojtur bregdetare, ndërsa më pas protestat janë zgjeruar me kërkesa më të gjera, përfshirë dorëheqjen e kryeministrit.
Manifestime janë zhvilluar jo vetëm në Tiranë dhe qytete të tjera të vendit, por edhe nga diaspora shqiptare në disa vende të Europës, duke e kthyer lëvizjen në një protestë me jehonë edhe jashtë kufijve të Shqipërisë.
“Ajo çfarë ndodhi tani shënon vërtet një gur kilometrik tjetër në rrugëtimin e pakthyeshëm të Shqipërisë në BE. Sapo ramë dakord të mbyllim tre kapituj të rëndësishëm negociatorë. Ky nuk është thjesht një hap, por një vlerësim që Shqipëria po ecën përpara, që reformat po japin rezultate. Se e sotmja është e rëndësishme edhe sepse thekson një mesazh mjaft të rëndësishëm të ‘Epokës së re’. Shqipëria jep rezultate, BE jep rezultate. Shqipëria ecën përpara dhe BE reagon për këtë.
Nuk mundem veçse të theksoj, Thomas, ishte shumë irlandeze. Super e martë. Shpresoj që ju ta ruani këtë ambicie. Faleminderit, Marta, që ke qenë kokëfortësisht e durueshme dhe që na ke mbajtur në drejtim pavarësisht pengesave.
Po i sjellim standardet europiane më pranë qytetarëve tanë. Po ndërtojmë Shqipërinë që duam të shohim si anëtare të BE-së. Prova më e mirë e kësaj është që njerëzit duan më shumë dhe janë gjithmonë më pak tolerantë ndaj asaj që nuk funksionon. Duhet të ecim përpara dhe të japim rezultate për njerëzit tanë”, tha Rama.
