Pasi SPAK dërgoi ditën e djeshme dosjen për gjykim, Edi Rama sot në Asamblenë e PS-së njoftoi mbajtjen e zgjedhjeve të reja në Tiranë, pasi kryeqytetit sipas tij, nuk duhet të rrijë pa “kokë” dhe i kërkoi Këshillit Bashkiak që mos e zgjatë më shumë se 7 ditë procesin e shkakrimit të Veliajt.
Po ashtu, ai shpalli edhe kandidaturën e PS-së, e cila do të jetë Ogerta Manastirliu, ndërsa ende nuk dihet emri që ajo do të ketë përballë nga opozita.
I ftuar në emisionin “Të Paekspozuarit”, analisti Andi Bushati, tha se opozita nuk duhet të hyjë në këto zgjedhje, pasi procedura për shkarkimin e Veliajt do të jetë e paligjshme.
Analisti shtoi se Manastirliu i fiton zgjedhjet, madje tha me humor se edhe “ministrja” me inteligjencë artificiale, Diella, do t’i fitonte zgjedhjet po të ishte kandidate, mjafton të kandidojë për PS.
“Po të jetë opozitë e fortë, nuk hyn në zgjedhje. Nëse procedura e shkarkimit është e paligjshme, opozita nuk duhet të futet në zgjedhje. Ata janë budallenj si demi dhe hidhen me brirë kur i tundin copën e kuqe. Puna është, a mund të shkarkohet Veliaj? Vetë Rama thotë kur mungon 6 muaj, por mungon me arsye nuk është aq e lehtë dhe ne do të mbledhim edhe Parlamentin thotë. Nëse ndërrohet ligji pas burgosjes së Veliajt dhe opozita hyn në zgjedhje se fryn bilbilit Rama, atëherë kot i thotë vetes opozitë. Ata jo Manastirliun, por edhe Diellën po futën ata, nuk e mundin dot”, tha Bushati.
