Bashkimi Europian po vlerëson kufizime të reja të gjera të aksesit të fëmijëve dhe të adoleshentëve në mediat sociale, duke përfshirë kufijtë e moshës, ndalimin total apo aksesin e pjesshëm.
Platformat sociale, ndër të tjera, mund të detyrohen të vërtetojnë se shërbimet e tyre nuk janë të dëmshme para se të rinjve t’u lejohen t’i përdorin.
Presidentja e Komisionit Europian, Ursula von der Leyen, deklaroi se organi ekzekutiv i Unionit mund të propozojë një rregullore të re brenda pak muajsh, pasi të analizojë rekomandimet e një grupi ekspertësh të publikuara sot.
“Fëmijët tanë kanë nevojë të kalojnë kohë në botën reale. Kohë për të luajtur, kohë për të krijuar miqësi, kohë për të bërë gabime. Kohë për të formësuar identitetin e tyre, personalitetin e tyre, para se të jetë algoritmi që t’i formësojë ata.
Nuk bëhet fjalë nëse fëmijët mund të kenë akses në mediat sociale, por se kur mediat sociale mund të kenë qasje te fëmijët tanë” – u tha von der Leyen gazetarëve në Bruksel.
Grupi i ekspertëve rekomandoi një qasje graduale, që përfshin “asnjë përdorim ekrani” për fëmijët nën moshën 3 vjeç, përdorimin e mbikëqyrur të internetit për fëmijët nën moshën 13 vjeç dhe disa kufizime për adoleshentët më të rritur.
Sipas ekspertëve, platformat e mediave sociale duhet të provojnë se shërbimet e tyre janë të sigurta për përdoruesit më të rinj, një qasje të cilën von der Leyen tha se e mbështet.
Presidentja e Komisionit Europian, Ursula von der Leyen, deklaroi se Komisioni do të shqyrtojë raportin dhe do të paraqesë propozime “pas verës”. Çdo masë ligjore gjithsesi do të duhet të miratohet nga Parlamenti Europian dhe të 27 vendet anëtare të BE-së para se të bëhet ligj në të gjithë bllokun.
Një propozim formal do t’u jepte një nxitje të konsiderueshme përpjekjeve globale për të kufizuar përdorimin e mediave sociale nga fëmijët, duke iu bashkuar një liste në rritje propozimesh ose rregulloresh në fuqi në vende si Mbretëria e Bashkuar dhe Australia.
Normat e reja gjithashtu do të shtonin presion të konsiderueshëm te platformat sociale, të cilat duhet të provojnë se shërbimet e tyre janë të sigurta për përdoruesit më të rinj.
Javën e kaluar, një hetim paraprak në BE zbuloi se Meta kishte shkelur Ligjin e Shërbimeve Digjitale (Digital Services Act) për shkak të dizajnit “që krijon varësi” të Facebook-ut dhe Instagram-it.
Një rezultat i ngjashëm u bë i ditur edhe kundër TikTok-ut më herët këtë vit. / The Verge
