Kryeministri Edi Rama gjatë fjalës së tij në Asamblenë e PS ka marrë rolin prokurorit për vrasjen e Egli Progës në Pogradec, i cili ndërro jetë pas dhunës së ushtruar dhe u la i shtrirë për minuta të tëra në rrugë.
Edhe pse familjarët e 42-vjeçarit që humbi jetën nga dhuna e ushtruar, kanë hedhur akuza të forta ndaj policisë se ka manipuluar ngjarjen e rëndë, Rama sot mori rolin e prokurorit dhe dha ‘provat’ e tij për vrasjen e e Egli Progës.
Rama nuk ngurroi të hidhte akuza ndaj politikës dhe mediave, ku tha se ngjarja është përdorur politikisht, ndërsa deklaroi se policia e bëri detyrën, por ka qenë një prokurore e paaftë që ndryshoi akuzën. Kryeministri tha se PS nuk mbron ministrat, dhe jo më një punonjës, i cili nuk është anëtar i PS, madje ka qenë i dënuar më parë.
“U vu kuja se policia kishte tentuar ta fshihte krimin. Gënjeshtër. Shpejtësia dhe ndalimi i autorit është dokumentuar. U tha se ambulanca erdhi 40 min me vonesë, gënjeshtër. Mbërritja e ambulancës është e dokumentuar.
U përhap përralla se autori kishte mburojë politike, gënjeshtër. Jo vetëm dihet botërisht që PS nuk mbron as ministrat, por në rastin konkret ai dajë në fjalë që dikur ka qenë pjesë e PS është një person i dënuar me detyrën dhe prej kohësh nuk ka asnjë angazhim me PS. I ndjeri po, ai ishte anëtar me tesër i PS dhe nuk ishte pronari i lokalit ku ndodhi përplasja, por punonjës i OSSHE”, tha Rama.
Rama: Protesta e organizuar kundër qeverisë mashtruese
Kryeministri më tej u përpoq që të shfajësonte policinë dhe fajin ja kaloi prokurores së çështjes. Sipas Ramës, popullit ju dha pa pikë turpi dhe mëshirë doza e helmit për të bërë politikë me një vdekje tragjike.
Ndërsa më tej, Rama sulmoi edhe protestën e shoqërisë civile për këtë rast, ku morën pjesë edhe familjarë të Egli Progës, ku tha se u organizua një protestë mashtruese kundër qeverisë, ndërkohë që çështje ishte dorëzuar korrektësisht nga policia në duart e pushtetit gjyqësor.
“Derisa e vërteta të veshtë pantallonat gënjeshtra me 7 bishta e bëri 7 xhiron e vendit tonë. Edhe me ndihmën e një prokurori të paaftë, që pa kryer asnjë hetim ndryshoi përcaktimin e policisë si vrasje me dashje në vrasje nga pakujdesia duke revoltuar të madh dhe të vogël. Kështu popullit ju dha pa pikë turpi dhe mëshirë doza e helmit për të bërë politikë me një vdekje tragjike. Derisa duke organizuar një protestë mashtruese kundër qeverisë, ndërkohë që çështje ishte dorëzuar korrektësisht nga policia në duart e pushtetit gjyqësor.
Për të larë ujin e trashë me të hollin, prokuroria mori një të pandehur një polic patrulle, duke treguar se as nuk e ka haberin e rolit të patrullës në raste të tilla. Më keq akoma, duke bërë politikë në vend që të bënte hetim të pavarur”, tha ai.
Po çfarë pretendojnë familjarët e Egli Progës?
Jonida Proga, motra e 42-vjeçarit Egli Proga, i cili u dhunua për vdekje në Pogradec, akuzon Policinë e Shtetit se për të tretën herë ka përdhosur të ndierin me tentativat për të manipuluar provat e krimit të rëndë.
Gjatë një reagimi në rrjetet sociale, Jonida Proga ka zbuluar pamje nga vendi i ngjarjes, ku kriminelët me “bekimin” e policisë prishin provat e krimit duke “larguar makinën tek e cila kriminelët rrëzuan Eglin”.
Siç mund ta shikoni nga pamjet më poshtë të publikuara nga Jonida e cila me një rreth të bardhë ka veçuar personat të cilët kryen krimin, por qëndronin të qetë në lokal duke pirë kafe kurse policia nuk i arreston por përkundrazi i lejon të prishin provat.
Siç mund të shihni në pamjet më poshtë, makina lëviz nga vendi i krimit ndërsa policët bëjnë sehir duke lejuar që të prishen provat në një skenë krimi, ndërsa automjeti siç thekson Jonida “ishte i lyer me gjakun e Eglit“.
“Asnjë polic në botë nuk mund të justifikojë lëvizjen e makinës së bardhë me targa AD049T nga vendi i krimit. Asnjë polic i ndershëm shqiptar nuk do lejonte që ajo makinë me prapakolp lyer me gjak të largohej nga vendi i krimit rrethuar me piketa policie. E kundërta ndodhi në sy të POLICISË, Arjan Manellari merr makinën e Leonidha Guçes dhe largohet. Asnjë polic në planet nuk do bënte sehir pak minuta pas vrasjes nëse do shihte si pinin kafe te STROPCKA kriminelët Arjan Manellari, Leonidha Guçe bashkë me Voltan Shkulakun që NUK PANË ASGJË”, shkruan ndër të tjera Jonida.
Lexo edhe:
Motra e Egli Progës rendit faktet: Si policia bashkëpunoi me kriminelët për të manipuluar provat
