Kryedemokrati Sali Berisha ka mbajtur një takim me të përndjekurit politikë, në ambientet e selisë blu.
Berisha iu referua represionit politik gjatë periudhës komuniste, teksa u shpreh se shumë inxhinierë dhe specialistë u përndoqën, u burgosën apo u ekzekutuan, sipas tij, jo për shkak të paaftësisë profesionale, por si pasojë e klimës së dyshimit dhe akuzave për armiqësi ndaj regjimit.
Kryedemokrati kritikoi nderimin e figurave të cilësuar prej tij si “banditë dhe kriminelë”, duke e cilësuar këtë si një goditje morale ndaj shtresës së të përndjekurve politikë.
Berisha vijoi akuzat ndaj mënyrës së vlerësimit të figurave publike, duke e lidhur atë me, atë që sipas tij janë ‘një rikthim të praktikave të së kaluarës në planin moral dhe politik’.
Ai argumentoi se Shqipëria e sotme po përballet me probleme serioze në funksionimin e saj institucional.
“Ka dhe të tjerë. Ka rrugë të Tiranës, që kanë emra kriminelësh të damkosur të kombit shqiptar. Tani së fundmi, siç keni konstatuar, nderimet u shkojnë kriminelëve ordinerë. Nderohet i ati i Ergys Agasit, si fisniku i PS për Durrësin. Për hir të vërtetës, i biri është një nga mafiozët më të rrezikshëm, jo të Shqipërisë, por të Evropës. Nderohet Jurgen Çyrbja, deputeti që shërbente si informator për Altin Hajrin, vrasësin mizor. Del dhe dekorohet me dekoratë, me firmë të Edi Ramës. Pse i theksova këto? Është i njëjti moral, por sot Shqipëria nuk mund të ketë skuadra pushkatimi, sot Shqipëria nuk mund të ketë kampe internimi, por në kuadrin e atyre që mund të bëjë kjo Shqipëri, ngjan tmerrësisht në rrafshin politik me Shqipërinë e dikurshme. Se këto mund të bëjë. Ndaj dhe një dramë të madhe për një komb, se në një hark kohor, në një distancë 30 e ca vjeçare, të prodhojë një diktaturë të dytë, nuk ka. Kjo diktaturë e dytë, në disa aspekte, është regjimi më shkatërrimtar i kombit shqiptar në histori”, u shpreh Berisha.
