Me 75 vota pro, mazhoranca në Kuvend miratoi këtë të enjte kërkesën e SPAK për arrestimin e kreut të PD-së, Sali Berisha, në një seancë që zgjati rreth 9 minuta.
Arrestimi i Berishës u fut në rendin e ditës së seancës së sotme pasi u miratua fillimisht në Këshillin e Mandateve nga mazhoranca dhe Enlekejd Alibeaj i grupit “Basha”.
Vetë Berisha e cilësoi vendimin antikushtetues.
“Ky vendim, jo që nuk do mund të shkatërrojë qëllimet, shkatërrimin e opozitës, por ky vendim do të mobilizojë opozitën në shkallën më të lartë dhe nën moton: O sot, o kurrë do t’i japë përgjigjen më të merituar këtij regjimi”, tha Berisha në një prononcim për gazetarët pas përfundimit të seancës plenare.
“Beteja e nisur vazhdon fuqishëm si kurrë më parë dhe e garantoj se kjo opozitë do të qëndroje e pamposhtur në mbrojtjen e idealeve demokratike të saj”, shtoi ai, teksa më tej iu bashkua protestës para Kuvendit. Aty mbajti një fjalim dhe më tej iu drejtua selisë së PD-së, duke mbyllur dhe protestën e thirrur nga opozita, e nisur rreth orës 9:30.
Sipas procedurës, tanimë që mori dritën jeshile nga Kuvendi, prokuroria pritet ti drejtohet me kërkesë Gjykatës së Posaçme për vendosjen ndaj Berishës të një mase arresti, që pas miratimit, zbatohet nga policia.
Kërkesa e SPAK për arrestin ndaj Berishës krijoi një konflikt lidhur me interpretimin e nenit 73/2 të Kushtetutës – konkretisht çfarë cilësohet “heqje lirie”.
Në caktimin e masën “detyrim paraqitje” ndaj kryedemokratit, SPAK anashkaloi Kuvendin. Ndërkohë, Berisha u shpreh se kjo procedurë është anti-kushtetuese dhe nuk e respektoi vendimin e detyrim paraqitjes, dhënë nga GJKKO e konfirmuar më pas nga Apeli. Në këto kushte, SPAK iu drejtua Kuvendit duke i kërkuar leje për caktimin e një mase arresti ndaj kreut të PD.
Një grup deputetësh dekoratë iu drejtuan Gjykatës Kushtetuese për të zgjidhur konfliktin. Megjithatë, GJK u shpreh dje se nuk mund të shqyrtojë kërkesën e tyre, me argumentin se nuk janë palë në proces.
