Seanca e sotme plenare ishte një motamo e atyre të zhvilluara javët e fundit. Me një kohëzgjatje rreth 9 minuta, mazhoranca në Kuvend miratoi vendime të rëndësishme si autorizimi për arrestimin e Sali Berishës, ndërsa opozita vijoi me aksionin e pengimit të zhvillimit normal të punimeve parlamentare.
Tensionet nisën para fillimit të seancës, teksa deputetët demokratë po hynin në Kuvend, ndërsa opozita kishte thirrur një protestë para institucionit. Garda bllokoi hyrjen e deputetëve të përjashtuar nga punimet e parlamentit, ndërsa mes palëve pati përplasje verbale. Përplasje që vijoi më tej teksa deputetë të opozitës refuzuan kontrollet fizike nga garda.
E njëjta situatë edhe në sallën e seancës plenare, me gardën që tentoi të pengonte përmbysjen e karrigeve në sallë nga ligjvënësit e opozitës.
Me nisjen e seancës, deputeti i PD Flamur Noka ndezi disa flakadanë, ndërsa të tjerë deputetë të tjerë demokratë u binin tavolinave duke krijuar zhurmë në Kuvend.
Kryetari i PD-së, Sali Berisha refuzoi të merrte fjalën në Kuvend, pasi kryeparlamentarja Lindita Nikolla e njoftoi se mund të shprehur lidhur me kërkesën e nga SPAK për arrestimin e tij – që ishte pika e parë në rendin e ditës.
Pas kësaj, kryetarja e parlamentit, Lindita Nikolla, siç ka vepruar edhe në seancat e fundit, kaloi në votimin e projektligjeve dhe akteve në rendin e ditës.
Kërkesa e SPAK për ashpërsimin e masës së sigurisë ndaj Berishës u miratua me 75 vota pro. Një tjetër akt i rëndësishëm i miratuar nga shumica socialiste ishin ndryshimet për komisionet hetimore – përmes të cilave, mazhoranca synon që të kufizojë të drejtat e opozitës për ngritjen e komisioneve hetimore, si edhe të zhvillojë seanca të mbyllura me pretendimin e mbrojtjes së sekretit tregtar, atij shtetëror dhe moralit shoqëror.
Në seancën e sotme, prezent ishte dhe kryeministri Edi Rama.
Lulzim Basha dhe deputetët që e mbështesin nuk ishin të pranishëm në seancë, megjithatë njoftuan publikisht se janë pro arrestimit të Berishës.
