Katër shtetas janë arrestuar në Tiranë, pasi akuzohen se kanë ushtruar veprime të dhunshme gjatë ndeshjes Tirana-Partizani, që u mbajt ditën e djeshme në stadiumin Air Albania.
“Deri tani janë arrestuar 4 shtetas: D. A., 21 vjeç, R. M., 35 vjeç, Q. C., 19 vjeç dhe E. D., 19 vjeç, të gjithë banues në Tiranë”,- njofton Policia.
Ndërkohë janë proceduar në gjendje të lirë 3 persona dhe janë shpallur në kërkim dy të tjerë.
“Janë proceduar në gjendje të lirë 3 shtetas, njëri prej tyre 14 vjeç, dhe R. B., 26 vjeç, G. X., 24 vjeç, të tre banues në Tiranë.
Gjithashtu janë shpallur në kërkim shtetasit J. S., 27 vjeç, dhe M. B., 18 vjeç, të dy banues në Tiranë”,- thuhet në njoftimin e policisë.
Këta shtetas kanë hedhur lëndë piroteknike, flakadanë në fushë dhe kanë ushtruar veprime të dhunshme.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale, për veprat penale “Prishja e qetësisë publike”, “Goditja e sportistit, trajnerit, arbitrit, ndërmjetësit sportiv” dhe “Veprime të dhunshme në aktivitetet sportive”.
