Marrëveshja mes Korporatës Elektronergjitike Shqiptare dhe kompanisë amerikane “Excelerate Energy” për vendosjen e dy anijeve të prodhimit të energjisë elektrike në Triport të Vlorës, shihet me skepticizëm.
Shqetësimet që janë ngritur lidhen me impaktin mjedisor dhe koston.
Ambientalistët e kanë pritur me protesta këtë nismë të qeverisë, duke ngritur alarmin për ndotjen që sipas tyre do të krijojë efekte të pakthyeshme. Ministrja e Energjisë, Belinda Balluku është shprehur se emetimet janë brenda kritereve të Bankës Botërore. Megjithatë, një raportim mediatik zbuloi më vonë se certifikimi i anijeve në fjalë nuk është fare objekt i Bankës Botërore.
Aspekti tjetër që e bën marrëveshjen të shihet me dyshim është kostoja që do të paguajë KESH. Publikimet në media të detajeve të kontratës që do ti kushtojë buxhetit plotë 68 milion dollarë, për ekspertë të ekonomisë, është një shofer e ekzagjeruar që jo vetëm nuk sjell eficencë, por shkakton shpërdorim të parave publike. Publikimi i kontratës zbuloi një tjetër gënjeshtër të ministres Balluku e cila premtoi se anijet pas dy vitesh do të mbeten në pronësi të shtetit shqiptar.
Një tjetër raportim mediatik zbuloi se edhe pse sipas marrëveshjes, më 1 janar duhet të kishte nisur prodhimi i energjisë elektrike nga dy termocentralet lundruese në Vlorë, anijet s’kanë prodhuar ende asnjë megavatorë energji elektrike.
Për opozitën ndërkohë, e gjitha është një aferë e madhe korruptive.
Kryetari i PD-së, Sali Berisha e ka denoncuar marrëveshjen qysh pa mbërritur anijet në brigjet shqiptare.
Çështjen e risolli në vëmendje edhe këtë të Hënë, gjatë një takimi me strukturat në Tiranë.
Akuzat për Yuri Kim
Berisha kujtoi episodin e nëntorit të vitit të kaluar, kur ambasadorja Yuri Kim u shfaq në Triport dhe krah ministres Balluku, mbrojti marrëveshjen.
Kryedemokrati ngriti dyshime se ambasadorja amerikane në vendin tonë është e përfshirë në atë që ai e quan aferë e madhe korruptive.
“A e dini ju ato fantazmat në gjirin e Vlorës. I kontrakton dhe i firmos pa tender, Edi Rama dhe Belinda Balluku. Shkon dhe i bekon edhe guvernatorja, Yuri Kim që hesht tani si fija e barit. Një aferë nga më korruptivet. Sa paguhet thoni ju, 90 mijë euro çdo ditë qeraja, 90 mijë euro. Në dy vite llogariteni vetë sa do paguajmë. Dhe kjo zonja që nuk linte ditë pa dalë, pa dizinfomuar, pa gënjyer në media, nuk thotë asnjë fjalë. Po pse? Është absolutisht aferë korruptive dhe është edhe vetë e implikuar vetë aty direkt. E thashë, nëse ne patëm të ndihmë të jashtëzakonshme nga autoritetit e SHBA në luftën ndaj korrupsionit, këto 4-5 vite kanë qenë vite të turpshme, ku zyrtarë të nivelit të lartë u bënë gjeneratiorë korrupsioni të lartë në Shqipëri”, theksoi Berisha.
“Edi Rama bërtet, nuk korruptohet Amerika dhe këtë e përdor si mburojë. Amerika nuk korruptohet, por amerikanët korruptohen. Amerikanët kanë heronj, por kanë edhe McGonigalë. Amerikanët kanë pasur ambasadorë të shkëlqyer në këtë vend, duke filluar nga ambasadori i parë, e me radhë. Por kanë pasur edhe një lloj si kjo e cila është e zhytur fund e krye në korrupsion. Çfarë e shtyn atë të shkojë e të mbulojë aferën korruptive të Belinda Ballukut tek ato anijet fantazmë, që na gjobisin çdo ditë 90 mijë euro? Por në vend po të ishte për transparencë u thoshte ikni aty”, shtoi ai.
