Qeverinë e drejtuar nga Edi Rama, Sali Berisha e quan regjim.
Në një takim me strukturat këtë të Hënë në Tiranë, Berisha tha se “do të përdorim çdo mjet të mosbindjes civile për ta përmbysur”.
“Ne takohemi sonte para një ngjarje shumë të rëndësishme për revolucionin tonë demokratik, para protestës së 3 marsit me të cilën ne duam ti demonstrojmë këtij regjimi që i bazuar në krimin, drogën dhe vjedhjen e qytetarëve shqiptarë, ka vendosur në Shqipëri monizmin si një fatkeqësi të madhe kombëtare. Duam ti demonstrojmë këtij regjimi se ne në asnjë rast dhe kurrë nuk do të pajtohemi me monizmin e tij dhe se ne do të bëjmë gjithçka për përmbysjen e këtij monizmi. Koha e stabilitetit në kushtet e monizmit ka marrë fund njëherë e përgjithmonë. Ne do të jemi në këmbë, në betejë, ne do të përdorim çdo mjet të mosbindjes civile për ti shkurtuar ditët dhe për të përmbysur këtë regjim”, tha Berisha.
Kryedemokrati u ndal dhe te plaga e emigracionit masiv dhe përgjegjës bëri qeverinë dhe kryeministrin Edi Rama.
“Ky regjim, për çdo shqiptar të vërtetë, çdo shqiptar që i thotë lirisë së vet liri, dinjitetit, dinjitet, është më i egër se çdo pushtim që shqiptarët kanë njohur në histori. Ky regjim sotme politikat që ka ndjekur, me varfërimin masiv të shqiptarëve, me shndërrimin e votës në një letër pa vlerë, fiktive ua ka nxi jetën shqiptarëve, ua ka bërë vendin e tyre një vend në të cilin ata nuk mund të jetojnë. Ka shndërruar Shqipërinë në një vend ku të rinjtë dhe qytetarët largohen masivisht, shumë më tepër se ata vendet e të cilëve janë në luftëra civile, ose kanë pësuar kalamitete të mëdha natyrore. Nëse ju lexoni, nëse ju kërkoni, ju nuk mund të gjeni kurrë një vend të dytë në të cilin, një hapësirë kohore 8 vjeçare të jenë larguar prej tij, ta kenë braktisur atë mbi 1/3 e popullsisë. Përzëniet nga Shqipëria të qytetarëve, të rinjve veçanërisht nga ky regjim, tejkalojmë parashikimet e Çubrilloviçit, tejkalojnë çdo parashikim”, shtoi.
Ai solli në vëmendje dhe pagat si dhe rritjen e borxhit publik. “Në vitin 2013, shqiptarët kishin rrogat më të larta në rajon, përfshirë këtu dy vende anëtare të BE-së, Bullgarinë dhe Rumaninë. Sot ku jemi, sot i kemi 40 % më të ulëta se në Kosovë. Dhe në disa sektorë, edhe dy herë më të ulëta“, deklaroi.
Gjatë fjalës së tij, Berisha u ndal edhe te inceneratorët duke deklaruar se janë “ndërmarrje e Ramës”.
Kreu i PD u shpreh se Rama e ka shndërruar drejtësinë në seksion të PS.
Berisha theksoi se “revolucioni do fitojë, asgjë s’do na dekurajojë”. “Qëllimi është që shqiptarët të votojnë të lirë dhe kjo realizohet kur vendi të mos ketë më stabilitet derisa të kthehet vota e lirë”, shtoi ai.
Berisha u shpreh Rama është politikani i vetëm që u akuzua direkt nga OSBE se kishte 200 mln euro në ofshore në vitin e parë si kryeministër.
“Mos harroni një gjë. Edi Rama është politikani i vetëm që u akuzua direkt nga OSBE në raport. Vitin e parë që u bë kryeministër se ka në llogaritë ofshore 200 mln euro. Po nuk ktheu përgjigje kurrë. Se një raport edhe mund të mos i ketë të sakta, por ti je i detyruar ta kthesh një për një dhe ta hedhësh edhe në gjyq, dhe ti thuash hajde provo shpifjet tua. Asnjë përgënjeshtrim nuk bëri, as në gjykatë nuk hodhi se OSBE i tregonte faturat atij“, tha.
Kryedemokrati shtoi më tej se pas ndërtimeve pa leje në qytetet e vendit “qëndron ryshfeti që i është dhënë policisë”.
“Rama shtrohet në dreka e darka 10 mijë euro, sikur të ishte emir apo sulltan”, tha më tej, duke iu referuar një deklarate të ish-të dashurës së Charles Mcgonigal, se ish-agjenti i FBI-së kishte konsumuar në një rast, një darkë në SHBA me kryeministrin Edi Rama, që kishte kushtuar 10 mijë euro.
