Një orë e gjysmë ka zgjatur protesta për vdekjen e të riut Lear Kurti.
Qytetarët kanë kërkuar drejtësi dhe zbardhjen e plotë të ngjarjes për të riun që humbi jetën në komisariatin nr.3 në Tiranë, madje protestuesit duke fajësuar autoritetet për papërgjegjshmëri dhe mungesë transparence.
Protesta nisi rreth orës 19:30 përballë Ministrisë së Brendshme, ku qytetarët me pankarta në duar brohorasin: “Polici e krimit…Policia e krimit”, gjithashtu ata kanë kërkuar dorëheqjen e ministrit të Brendshëm, Bledi Çuçi i cili duhet të mbajë përgjegjësi për këtë ngjarje të rëndë pasi një 32-vjeçar vdes në duart e uniformave blu.
Pas më shumë se 45 minutash, qytetarët marshuan drejt Kryeministrisë ku mbajtën një minutë heshtje dhe ndezën qirinj në nder të Lear Kurtit. Ndër të tjera në përfundim të protestës, ata paralajmëruar se do të ketë edhe një tjetër protestë dhe se ora dhe dita do të njoftohet në rrjete sociale. Protesta u mbyll paqësisht pasi nuk u shënua asnjë incident.
Një prej protestuesve tha se po përdoret e njëjta skemë si në rastin e Klodian Rashës, ku po tentohet të përbaltin fugurën e viktimës.
I riu: “Policia janë bërë si djemtë e këqinj, nuk janë mbledhur shumë por nuk kemi cfarë të bëjmë. Është e njëjta skemë si me Klodian Rashën, si duan ta fshehin dhe të përbaltin viktimën dhe ta nxjerrin policine duarlarë. Duhet të bëhët dicka sa më shpejt të jetë e mundur”
Ndërsa mbante një fjalim para Ministrisë së Brendshme për vdekjen e Lear Kurtit dhe mënyrën sesi ai u shoqërua, aktivistja Nertila Haxhiaj është ndjerë keq.
Ajo ka humbur ndjenjat dhe ka rënë në tokë. Të pranishmit i kanë dhënë ndihmën e parë ndërsa ka qëndruar për pak minuta e shtrirë.
- Ku ishte Edi Rama gjatë orarit kur u zhvillua protesta?
Në një kohë kur në mes të Tiranës qytetarë të shumtë kanë dalë për të protestuar për vdekjen e Lear Kurtit, kryeministri Edi Rama i pa shqetësuar qesh dhe bën shaka me simpatizantë të Partisë Socialiste gjatë një takimi mbrëmjen e sotme në qytetin e Elbasanit.
Nga Elbasani, kreu i qeverisë po ndante disa certifikata të mirënjohjes për qytetarët që kanë investuar dhe kanë dhënë kontributin në këtë zonë. Midis shumë qytetarëve të vlerësuar, titullin e “Mirënjohjes” e mori gazetari Elton Kikia që la profesionin e tij dhe kryeqytetin duke zgjedhur të punojë në fshat.
Teksa i dha certifikatën e Mirënjohjes Kikias, Rama tha me batutë: “Respekte! La gomerët e qytetit dhe erdhi për t’i parë hajrin gomaricave këtu në fshat” (qesh).
Ky është kontrasti mes qeverisë Rama që qesh dhe qytetarëve që ngrihen në protestë për të kërkuar drejtësi. Pas Klodian Rashës, 8-vjeçares Joandës, tashmë është radha e Lear Kurtit që të mbetet viktimë në duart e policisë së shtetit.
- Si ndodhi ngjarja e 19 tetorit ku humbi jetën Lear Kurti?
Lear Kurti humbi jetën pasi u shoqërua nga efektivët në komisariatin nr.3. Atij iu kërkua të ndalonte në orën 23:07 të mbrëmjes së 19 tetorit nga efektivët, në rrugën “Riza Çuka” në Laprakë, por vrapoi dhe u largua. Siç sqarohet në njoftimin e policisë, i riu është kapur pas ndjekjes, është dërguar në komisariat, ku ka shfaqur problemet e para shëndetësore.
Fillimisht u aludua se i riu vuante nga epilepsia, më pas, në deklaratën zyrtare u tha se i riu kishte gëlltitur një qese me lëndë narkotike. kontradikta është në faktin që efektivët pretendojnë se ka ndërruar jetë në spital, ndërsa bluzat e bardha të Traumës thonë se Kurti ka mbërritur pa shenja jete në duart e tyre.
Paraprakisht, nga hetimet e derimë tanishme, është deklaruar se në trupin e viktimës nuk kishte shenja dhune. Por për kryedemokratin Sali Berisha, Kurti u vra nga Policia dhe ngjarja po mundohet që të mbulohet ashtu si rasti i Klodian Rashës, 2 vite më parë, i cili u qëllua për vdekje nga një efektiv policie.
