Policia e Shkodrës ka goditur dy raste të paligjshmërisë, një në fushën e armëmbajtjes pa leje dhe një tjetër në fushën e narkotikëve.
Në lagjen “Liria”, shërbimet e Forcës së Posaçme “Shqiponja” ndaluan një automjet në të cilin udhëtonin shtetasi M. K. dhe një 16-vjeçar. Gjatë kontrollit fizik, te i mituri u gjet një sasi lënde e dyshuar kanabis, e cila u sekuestrua si provë materiale.
Më pas, gjatë kontrollit të banesës së 40-vjeçarit M. K., në fshatin Barbullush, u gjet dhe u sekuestrua një pistoletë dhe municion luftarak.
Në përfundim të veprimeve, specialistët për Hetimin e Narkotikëve arrestuan në flagrancë shtetasin M. K., 40 vjeç, për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Ndërkohë, materialet u referuan në Prokurori, ku nisi procedimi penal për 16-vjeçarin, i dyshuar për veprën “Prodhimi dhe shitja e narkotikëve”.
