Organizata kriminale shqiptare e asaj që konsiderohet si “karteli i parë shqiptar i narkotrafikut” e që drejtohej nga Franc Çopja dhe Ervis Çela rezulton të ketë qarkulluar miliona euro të përfituara nga aktiviteti kriminal.
Në dosjen voluminoze prej 282 faqesh, ajo që vihet re është anëtarët e kësaj organizate dyshohet që përtej rrugës detare, sasitë e kokainës t’i transportoni edhe me avionë privatë të blerë enkas.
Gjatë një bisede zhvilluar në dhjetor të 2020 të kryer në aplikacionin Sky Ecc, ngrihen dyshime se Ervis Çela ka nisur një sasi prej rreth 8 tonë kokainën si dhe ka blerë një avion të vogël të cilin e përdor për të transportuar lëndë narkotike direkt nga vendi i prodhimit për në magazinat e tij.
“Seriozisht e ke që ke blerë avion??? Ahahaha lart më lart të pafsha zemra, ta gëzosh zemra”, thuhet në dosje.
Miliona eurot e përfituara nga trafiku i kokainës silleshin në Shqipëri kryesisht me linja të transportit të udhëtarëve. Fitimet e mëdha, të cilat kapnin dhjetëra miliona euro, investoheshin në prona dhe biznese në vendin tonë dhe vende të tjera të Europës.
Dorëzimi i parave bëhej në vende të mbyllura, kryesisht në garazhe, ku trafikantët sipas bisedave të përgjuara shpreheshin se ishte vend më i sigurt se sa t’i dorëzonin në rrugë. Në dosje përmendet po ashtu një episod kur në Shqipëri është dorëzuar shuma prej 595 mijë eurosh.
Një pjesë e parave groposej, në vendin tonë, ashtu sikundër edhe sasi droge që groposeshin nga trafikantët jashtë territorit shqiptar e që hidheshin në treg në kohë më të përshtatshme.
Në një tjetër bisedë të kryer mes dy drejtuesve të grupit, Ervis Çela dhe Franc Çopja, diskutojnë për fshehjen e parave nën rrënjët e ullinjve në Shqipëri.
Çela shkruante se zotëronte 200 ullinj dhe planifikonte të hapte një gropë për secilin prej tyre, por Çopja ishte më i kujdesshëm dhe e këshillonte që paratë t’i kthente në lingota ari, pasi paratë të groposura në tokë rrezikonin të dëmtoheshin.
Në një tjetër bisedë të bërë më shkurt 2021, Franc Çopja shprehej se “nuk dinin ku t’i çonin lekët” dhe se do t’i shndërronin në ar, duke përmendur sasi deri në 1000 kg flori. Nga komunikimet dyshohet se grupi kriminal ka bashkëpunuar edhe me një shtetas brazilian si dhe në një rast ka trafikuar edhe armë zjarri.
Në dosjen voluminoze thuhet se Ervis Çela ishte personi kryesor që bashkëpunonte me shtetas nga Brazili, Paraguai dhe vende të tjera të Amerikës Latine, me ndikim në portet e imbarkimit në ato vende.
Lënda narkotike pasi sigurohej, më pas kamuflohej me produkte të ligjshme si fruta ekzotike, drithëra, minerale, produkte industriale e bujqësore.
Organizata kriminale u godit pak ditë më parë nga SPAK, në bashkëpunim me Europol dhe agjenci të tjera ligjzbatuese europiane. Anëtarët e saj u zbuluan nga zbërthimi i aplikacionit Sky Ecc, ku hetuesit kanë në duar përgjime të shumta, foto të sasive të drogës, së parave, por edhe të takimeve të bëra nga trafikantët mes njëri-tjetrit.
SPAK lëshoi në total 15 urdhërarreste, 6 prej të cilëve vijojnë të jenë në kërkim. Franc Çopja i njohur edhe si Franc Gergely, është i arrestuar më herët në Belgjikë. Ndërsa një muaj më parë Ervis Çela u kap në Himarë për një tjetër dosje penale, nën akuzën e vrasjes.
Në fokus të hetimeve të kësaj dosje janë dy ngarkesa të mëdha. 11.6 tonë kokainë të transportuara nga Paraguaji në Belgjikë, dhe 16.4 tonë të tjera nga Paraguaji në Gjermani, në Hamburg./A2 CNN
