Presidentja e Kosovës, Vjosa Osmani, ka paralajmëruar se do t’i drejtohet sërish Gjykatës Kushtetuese për të kërkuar sqarime rreth pasojave ligjore nëse nuk respektohet afati 30-ditor për konstituimin e Kuvendit. Deklarata e saj u bë gjatë një diskutimi në Hudson Institute në Washington D.C., ku ndodhet për vizitë zyrtare në SHBA.
Osmani tha se aktgjykimi i fundit i Gjykatës Kushtetuese përcakton qartë që Kuvendi duhet të konstituohet deri më 26 korrik, por ende nuk është sqaruar se çfarë ndodh nëse ky afat nuk respektohet.
“Duket se do të më duhet t’i drejtohem përsëri gjykatës dhe t’i parashtroj këtë pyetje veçmas. Dhe shpresoj që ata do të përgjigjen”, u shpreh Osmani, duke shtuar se ajo ruan një grimë shprese se në javët në vijim Kuvendi do të mund të konstituohet dhe vendi të ketë një qeveri, “sado e brishtë qoftë ajo”.
Ajo kritikoi faktin që Kushtetuta e Kosovës nuk ka parashikuar një situatë bllokimi institucional të tillë, duke shtuar se është hartuar me bindjen se bashkëpunimi ndërmjet ligjvënësve do të ishte norma, jo përjashtimi.
Kujtojmë se më 26 qershor 2025, Gjykata Kushtetuese ka shpallur aktgjykimin KO124/25, sipas të cilit Kuvendi i Kosovës duhet të konstituohet brenda 30 ditësh nga ajo datë. Por pavarësisht kësaj, ende nuk janë zgjedhur kryetari dhe nënkryetarët e Kuvendit, duke mbajtur të pezulluar procesin.
Në përfundim, Osmani e cilësoi urgjente për Kosovën që të dalë nga kjo situatë ngërçi, për të shmangur pasoja të mëdha politike dhe institucionale në vend.
