Policia e Durrësit ka reaguar në lidhje me denoncimin e sotëm të Adriatik Lapajt, i cili pretendonte se gjatë pasdites një anëtar i krimit kishte kërcënuar me armë në brez kandidaten e tij në Qarkun e Durrësit, Valbona Myhedinin.
Autoritetet thonë se ka qenë vetë Valbona Myhedini, e cila ka bërë kallëzim në Polici dhe pas verifikimeve, është identifikuar dhe arrestuar autori.
Bëhet fjalë për shtetasin A.B., 45 vjeç, banues në Durrës, të cilit i është gjetur një armë lodër, teksa ai vuan edhe nga probleme të shëndetit mendor.
“Rreth orës 21:15, shërbimet e Policisë bënë të mundur lokalizimin, kapjen dhe shoqërimin në ambientet e DVP Durrës të shtetasit A.B., 45 vjeç, banues në Durrës. Gjatë kontrollit fizik, këtij shtetasi iu gjet një pistoletë plastike (lodër), të cilën 45-vjeçari e mbante në brez dhe dyshohet se ka ngritur xhupin duke ia treguar shtetases V.M. për ta kërcënuar.
Nga verifikimet e kryera rezulton se 45-vjeçari vuan nga probleme të shëndetit mendor dhe është i regjistruar dhe i evidentuar nga shërbimi psikiatrik.” – njoftojnë autoritetet.
Policia thotë se nën drejtimin e Prokurorisë vijojnë veprimet procedurale në ngarkim të 45-vjeçarit..
VIDEO/ Denoncimi i Lapajt: Anëtari i krimit në Durrës i tregon armën kandidates për ta intimiduar
