Përpos duelit pozitë opozitë Tirana do të jetë qarku ku vëllezërit armiq brenda partive do të kacafyten për vdekje midis tyre. Në këtë zonë nga e cila këto zgjedhje prodhohen 37 deputetë (1 më shumë se në 2021-shin), të gjitha partitë garuese kanë renditur nga 12 deputetë në listë të sigurtë dhe nga 37 secila në listat e hapura.
Këtu cilido që merr qoftë edhe 1 votë më shumë sesa kolegu rival brenda partisë, futet në parlament si i 13, i 14 apo i 15-ti i listës. Por problemi është se vendet janë të limituara.
Po të marrim si bazë krahasimi zgjedhjet e vitit 2021 ato në Tiranë prodhuan 18 mandate për PS-në, 15 për PD-në, 2 për LSI-në dhe 1 për PSD e Tom Doshit. Pra, pak a shumë, dy partitë e mëdha do hedhin në luftë sëbashku 74 kandidatë për deputetë vetëm për 11 vende. Eshtë e vërtetë që këtë herë Tiranës i është shtuar 1 deputet më shumë, por po të llogarisës edhe partitë e reja “Lëvizja Bashkë” të Arlind Qorrit, “Shqipëria bëhet” të Llapajt dhe “Mundësia” të Shehajt, që tani për tani sipas sondazheve mund të marrin së paku nga një deputet, pjesa e tortës zvogëlohet shumë.
Më e sakatuar nga lufta brenda llojit mund të dalë PS-ja. Ajo mendohet të marrë 5 deri në 7 deputetë nga lista e hapur. Por aty konkurenca është e frikshme. Së pari në garë për këto pak karrige do të jenë tre ministra aktualë, ai i brendshëm Ervin Hoxha që kontrollon policinë, ai i ekonomisë, Blendi Gonxhe që drejton një sërë dikasteresh të mbledhura bashkë e që për më tepër është dhe drejtues politik në kombinat, ajo e Bujqësisë Anila Denaj, që gjithashtu ka në dispozision fonde për fshatin dhe një administratë të tërë. Përpos këtyre në garë me shokët e vet të partisë janë edhe të vetmit socialistë të cilëve militantët ua mbajnë mend emrat: Pandi Majko, Fatmir Xhafa dhe Erion Braçe. Po këtu do të fusin hundët edhe garues me dominim në zona të caktuara lokale si Orlando Rakipi që në zgjedhjet e kaluara qe i vetmi që theu herësin dhe u fut në kuvend, Xhemal Qefalia apo Florian Pullazi. Për një votë më shumë do të cfiliten edhe ish ministra të qeverive Rama në vite si, Ermonela Felaj, Olta Xhaçka apo Etilda Gjonaj. Po në këtë listë gjenden edhe deputetët e legjislaturës aktuale, Blerina Gjylameti, Toni Gogu, Plarent Ndreca, Klotilda Bushka, Etjen Xhafaj.
Pra vetëm deri këtu kemi 17 konkurentë që do t’i hanë mishin dhe s’do i lënë as kockën socialistëve të tjerë për të kapur ato pesë deri në shtatë mandate. Dhe të llogarisësh që përpos tyre do të garojnë edhe 20 të tjerë më pak të njohur.
Edhe më vëllavrasëse paraqitet situata në radhët e opozitës e cila ka në dispozicion 4 deri në 6 vende, pa llogaritur këtu partitë e reja që priren më shumë të grumbullojnë vota anti-qeveri. Situatën në këtë kamp e ka rënduar edhe fakti se dy nga aleatët që mendohen se kanë një strukturë partiake dhe në të shkuarën kanë mbledhur vota, Ilir Meta dhe Shpëtim Idrizi, kanë futur njerëzit e tyre në listën e mbyllur dhe vetë do të konkurojnë në atë të hapur. Pra mund të ndodhë që të gjithë tjerët të luajnë vetëm për dy tre vendeve. E midis tyre janë një personazh i njohur në Tiranë si doktor Ilir Alimehmeti; dy deputete të stazhionuara dikur armike të foltores, si Jorida Tabaku dhe Dhurata Çupi dhe ai që e la Bashën i fundit, Kreshinik Çollaku.
Po ashtu mes 37-ëve ka dhe shumë politikanë që iu bashkuan që në fillim Berishës (atij që ka rezervuarin më të madh të votave) për t’i kthyer atij vulën dhe selinë. Po t’i shtosh këtyre deputetë dhe ish deputetë me mbështetje në periferi si Asllan Dogjani, Myslym Murrizi apo Arjan Hoxha, gara edhe këtu bëhet shumë e ngjeshur për shumë pak mundësi.
Prandaj ky sistem zgjedhor, ku disa fitojnë qyl ndërsa të tjerët kacafyten për një mundësi gati iluzore do na dhurojë jo vetëm një duel të ashpër mes dy forcave të mëdha, por, në fund të garës, do i nxjerrë ato të sfilitura edhe brenda tyre.
Lista e hapur e Ramës 1Andi Seferaj 2Anila Denaj 3Antonela Dedej 4Arben Pellumbi 5Blendi Gonxhe 6Blendi Sulaj 7Blerina Gjylameti 8Edlira Dyrmishaj 9Eldi Cepeli 10Endrit Brahimllari 11Entela Ramosaco 12Erion Brace 13Ermonela Felaj 14Ervin Hoxha 15Etilda Gjonaj 16Etjen Xhafaj 17Fatmir Xhafaj 18Florian Pullazi 19Glindxhet Madhi 20Halil Koloshi 21Halit Valteri 22Julinda Dhame 23Kejsi Elezi 24Klotilda Bushka 25Mimi Kodheli 26Mirgit Vata 27Olta Xhacka 28Ornaldo Rakipi 29Pandeli Majko 30Persida Shkrepa 31Plarent Ndreca 32Roy Bashaj 33Silda Cepe 34Sofika Lleshi 35Toni Gogu 36Xhemal Qefalia 37Ylli Shehu
Lista e hapur e opozitës 1. Ethem Aga 2. Ilir Alimehmeti 3. Erisa Bajaziti 4. Kreshnik Çollaku 5. Rivelino Çuno 6. Eduart Çaça 7. Dhurata Çupi 8. Petrit Doda 9. Asllan Dogjani 10. Mhill Gecaj 11. Petrit Gjorgji 12. Altin Goxhaj 13. Mimoza Hajdarmataj 14. Edit Harxhi 15. Arjan Hoxha 16. Lisandër Hoxha 17. Florenca Hoxha 18. Rudin Avdiu 19. Jurgia Ilirjani 20. Shpëtim Idrizi 21. Albia Elezi aleat 22. Salvador Kaçaj 23. Adriana Kalaja 24. Arnold Kariqi 25. Akil Kraja 26. Besim Kuka 27. Pranvera Kurpalaj 28. Ilir Meta 29. Grigels Muçollari 30. Myslym Murrizi 31. Jonathan Pano 32. Artur Roshi 33. Sali Shehu 34. Lili Sula 35. Jorida Tabaku 36. Ilda Zhulali 37. Xhulia Xheka/ Lapsi.al
