Kryeministri Edi Rama ka bërë një deklaratë të pazakontë mbi protestat e zhvilluara gjatë muajve të fundit, duke pranuar se lëvizja e njohur si “Revolucioni i Flamingove” përbënte një sfidë edhe për vetë qeverinë.
Në fjalën e tij gjatë mbledhjes së grupit parlamentar të PS-së dhe anëtarëve të kabinetit qeveritar, Rama u shpreh se revolucioni i flamingove e ka sfiduar.
Pasi i ka ofenduar protestuesit prej gati dy muajsh, Rama papritur u shpreh se kjo protestë duhet të shërbejë si një sinjal për mazhorancën dhe se duhet të shërbejë si fundi i një epoke dhe fillimin e një tjetre.
“Kjo ishte me e fuqishme se arsenali ynë kundër gënjeshtrave lidhur me projektin e Zvërnecit. Mësimi i parë që dua të ndaj me ju është se faktet tona nuk mjaftojnë më!
Njerëzit këtu nuk jetojnë më me kënaqësinë me të cilin ndërtonim, siç ndodhte dje. Ata sot jetojnë me pritshmëri që rriten më shpejt se sa mundësitë tona për t’iu përgjigjur. Ata e përjetojnë zhvillimin si një tension, mes asaj që shohin e dëgjojnë dhe asaj që kanë. Herë si burim pikëpyetjesh për çfarë po bëhet me vendin dhe herë si pasiguri për pjesën e tyre.
Nuk mjafton më që të qeverisim të tashmen me investime, arritje e integrime, por duhet të qeverisim në harmoni me përvojën e përditshme. Bulevardi i Flamingove nuk duhet parë si protestë, por si pasqyrë që shoqëria na e vuri para dhe duke na sfiduar që të shohim vetveten, që të shohim nëse e kemi mendjen dhe zemrën në vendin e duhur për ta qeverisur Shqipërinë. Të cilën me doemos duhet ta kuptojmë ne të parët në të gjithë përmasat e saj. Unë vetë në pasqyrën e Bulevardit të Flamingove pashë mbylljen e një epoke, dhe fillimin e një tjetre.”, tha ai.
