Gjykata e Tiranës ka caktuar këtë të shtunë masat e sigurisë “arrest me burg” për 5 të arrestuarit mbrëmjen e 11 Dhjetorit, të cilët akuohen si pjesë e grupit kriminal që trafikonin armë nga Kosova drejt Shqipërisë.
Më konkretisht bëhet fjalë për 34-vjeçarin Endri Papa, 28-vjeçarin Aurel Manreka, 22 vjeçarin Gersi Llozha, 26 vjeçarin Kleo Muçalliu dhe 53-vjeçarin Tonin Shkambi.
Mësohet se gjatë seancës gjyqësore ata kanë pretenduar se nuk janë të përfshirë në trafikun mes dy shteteve të armëve dhe se nuk kanë pasur dijeni për aktivitetin e Valter Osmanit, i konsideruar si “koka” e grupit.
Nëpërmjet avokatëve ata pretenduan se e vetmja akuzë që mund të qëndroj në këtë rast është ajo e prodhimit dhe shitjes së armeve. Por, togat e zeza nuk i kanë marrë parasysh pretendimet e tyre dhe iu caktuan masën e sigurisë burg pa afat.
Urdhër-arresti për këtë grup kriminal u lëshua edhe për 20-vjeçarin Euxhenjo Manushi, djali i muzikantit të njohur saksofonist Adriano Manushi, i njohur me emrin e artit si Ad Sybardhi. Por, ai ndodhej në qeli, pasi u vu në pranga gjatë një operacioni të Anti-Drogës në Tiranë, mbrëmjen e 8 Dhjetorit, pasi u kapën me 1 kilogram e 50 gramë kokainë, me vlerë tregu rreth 270 mijë euro.
“Koka” e grupit të trafikut të armëve mes dy shteve dyshohet se është Valter Osmani, banues në lagjen e Kombinatit në Tiranë, por shkonte shpesh dhe në Kosovë, ku edhe u arrestua mbrëmjen e 10 Dhjetorit.
Mësohet se banesa e tij në Kombinat ishte baza kryesore e grupit në Tiranë. Gjatë kontrolleve të ushtruara nga unfirmat blu janë gjetur një pjesë e armëve të sekuestruara, të cilat dyshohet se në ditët në vijim do të shkëmbeheshin me kokainë.
Valter Osmani shkonte shpesh në Kosovë për të marrë dhe gjetur armë, të cilat më pas i sillte në Tiranë me makina dhe autobus dhe me bashkëpunëtorë të tjerë. Ndaj tij pritet të nisin procedurat për t’u ekstraduar në Tiranë, pasi mësohet se të gjitha provat kundër tij janë gjetur këtu.
Burime bëjnë me dije se shkëmbimi i armëve me kokainë bëhej në bazë të llojit të armës, nga 25 deri në 30 gram për pistoleta dhe më shumë për armët më të mëdha.
Ky aktivitet është shtrirë në një periudhë kohe prej gati dy vjeçare, por prokuroria e Tiranës, ka mundur të dokumentojë ligjërisht vetëm 6 raste. Hetimet kanë provuar se në disa episode Valter Osmani së bashku me persona të tjerë kanë shkuar drejt Kosovës më lëndë narkotike me vete dhe në kthim ata kanë sjell armë zjarri.
Në procedimet e përbashkëta mes dy vendeve është provuar shitja e armëve të zjarrit ku janë përdorur dhe agjentë të infiltruar. Hetimet për grupin në fjalë kanë nisur që prej 24 Majit të këtij vitit, ku u arrestuan në terminalin e autobusave në Tiranës, 4 të rinjtë nga Kosova, Blerim Krasniqi, Benjami Shala, Edonis Thaçi dhe Muhamed Krasniqi. Ata kishin transportuar me autobus nga Kosova një çantë brenda së cilës u gjetën 10 armë zjarri pistoleta, 10 krehra dhe sasi municioni luftarak.
Për të zbardhur rrjetin e trafikut të armëve, Policia shqiptare ka administruar dëshminë e një prej të arrestuarëve në muajin Maj dhe ky informacion më pas i është dërguar autoriteteve kosovare.
Nga hetimi është zbuluar se armët vinin nga Turqia dhe Serbia si armë sportive dhe më pas në Ferizaj modifikoheshin dhe bëheshin armë zjarri. Trafikantët përdornin ditën e shtunë dhe të dielë për kalimin në kufirin e Morinës, pasi sipas një marrëveshjeje mes dy vendeve makinat nuk kontrollohen në doganat respektive dhe kjo ishte në favor të trafikatëve.
Mbrëmjen e 10 Dhjetorit, autoritetet policore në Kosovë kanë ushtruar kontrolle në Ferizaj dhe Prishtinë, ku kanë sekuestruar 29 pistoleta dhe 3 armë të gjata të modeleve të ndryshme, 2635 fishekë/municion të modelit të ndryshëm, 2 automjete dhe pajisje të tjera TIK. Si rezultat i operacionit të mbrëmjes së 10 Dhjetorit, në Kosovë janë arrestuar dhe 8 shtetasit me inicialet Valter Osmani, K.K., S.H., Sh.J., A.H., Z.A., A.D. dhe B.A.
Ndërkohë, në Shqipëri operacioni është ezkekutuar mbrëmjen e 11 Dhjetorit, ku janë ushtruar kontrolle në 7 banesa, si dhe janë ekzektuar urdhër-arrestet për 6 personat e përfshirë në grup. Gjatë kontrolleve të ushtruara në Tiranë janë sekuestruar 22 armë zjarri “Zoraki”, një armë zjarri Ak 47, një granatë dore ofensive dhe 470 fisheke të llojeve të ndryshme.
