Kryeministri Edi Rama ka zgjedhur të mos komentojë arrestimin e dhunshëm të ish-Presidentit të Republikës, Ilir Meta, i cili u tërhoq zvarrë nga agjentët civilë dhe të maskuar me kapuça të forcave Operacionale të Policisë së Shtetit. Ai tha në emisionin “Opinion” se Meta është një subjekt me të cilin do të merret drejtësia
“Ke gjetur njeriun e gabuar për t’ia bërë këtë pyetje. Nuk kam asnjë koment. Është një subjekt me të cilin merret drejtësia, nuk kam asnjë koment”, tha Rama.
I pyetur në lidhje me mënyrën e arrestimit nga efektivët e policisë, Rama u përgjigj se Policia e Shtetit nuk varet nga ai.
“Policia e Shtetit nuk varet nga unë. Unë nuk drejtoj Policinë e Shtetit. Policia e Shtetit ka drejtues, ka protokolle, ka operacione që i ndërton mbi bazë të këtyre protokolleve. Dhe unë nuk bëj komente për një subjekt të drejtësisë. Jua kam lënë juve ta trajtoni si viktimë nëpër emisione, ditën dhe natën”, u shpreh ai.
Gjithashtu, Rama u pyet dhe mbi deklaratën e ish-kryeministrit italian, Matteo Renzi, dikur i konsideruar si mik i kreut të qeverisë shqiptare, i cili për televizionin “La7” bër një krahasim mes mënyrës se si u arrestua ish-kreu i shtetit shqiptar dhe se si pritet të trajtohen emigrantët nga Shqipëria. Por, sipas Edi Ramës, miku i tij Matteo Renzi flet broçkulla që i përdor për Italinë.
“Nuk e dëgjoj Matteo Renzin, se e kam mik, por ai ka hallet e veta dhe luftërat e veta atje në Itali edhe e përdor edhe ai këtë. Që ai ta përdori për Italinë një fakt që ndodh këtu dhe të flasi një broçkull të tillë, e përdor për Italinë. Por, që të fliten broçkulla këtu për Shqipërinë është problem.” – tha Rama.
Ndërkohë, kujtojmë dhe deklaratën e Matteo Renzit, i cili tha pas arrestimit të Metës:“Do t’i dërgojnë emigrantët në Shqipëri, një vend që siç e dimë ka standard tjetër. Kanë arrestuar tre orë më parë ish presidentin e Republikës së Shqipërisë, shikoni imazhet se si e tërheqin jashtë makinës, atë që ishte dikur president i Republikës, imagjinoje çfarë mund të bëjnë autoritetet shqiptare me emigrantët bangladeshas. Për emigrantët nga Bangladeshi ndoshta do të kenë më pak konsideratë”.
