Nga Boldnews.al
Aktivisti Adriatik Lapaj ka bërë një analizë shumë të thjeshtë, nga e cila, sipas tij, në Shqipëri hyn të paktën 450 mijë ton naftë kontrabandë në vit.
Në studion e “A2 CNN” pak ditë më parë, përfaqësuesi i “Shqipëria Bëhet” ka bërë një krahasim minimalist shifrash ndërmjet zhdoganimit të lëndës hidrokarbure në Shqipëri me shifrat e Kosovës.
Lapaj deklaron se në territorin e Shqipërisë qarkullojnë rreth 2 herë më shumë automjete se sa në Kosovë, por, sipas shifrave të Doganës Shqiptare, rezulton se në vendin tonë zhdoganohet rreth 50 mijë ton naftë më pak se sa në shtetin fqinj shqiptar.
Po ashtu, Lapaj u shpreh se në Shqipëri vijnë 7 herë më shumë turistë se në Kosovë, gjë që duhej shoqëruar me rritje të konsumit dhe, rrjedhimisht edhe të zhdoganinimit të naftës në vendin tonë. Por, shifrat tregojnë se Kosova zhdoganon më shumë naftë.
Për aktivistin Lapaj, shifra reale e naftës që hyn në Shqipëri në një vit është afërsisht 1.2 milionë ton. Por, sasia e zhdoganuar është rreth 750 mijë ton.
Sipas kësaj llogarie të thjeshtë, për të cilat Lapaj deklaroi se bazohen në analiza konkrete dhe të saktë, rezulton se rreth 450 mijë ton naftë hyn në vendin tonë kontrabandë çdo vit.
“Vlera totale e kontrabandës është 450 mijë ton naftë në vit. Vlera e akcizës që i humbet arkës së shtetit vetëm nga kjo kontrabandë llogaritet në rreth 450 milionë euro”, deklaroi ai.
Të dhënat e prezantuara nga aktivisti janë me të vërtetë trondisë, por, natyrisht, aspak të panjohura për autoritetet shqiptare, të cilat kanë në duar si shifrat e zhdoganimit në Shqipëri, ashtu edhe mundësinë për t’u krahasuar me zhdoganimet në Kosovë.
Shifrat e prezantuara në mënyrën më të thjeshtë dhe më të kuptueshme përbëjnë një akuzë publike të drejtëpërdrejtë për Doganat Shqiptare dhe drejtuesin e saj, Gent Gazheli.
Shoqata e Hidrokarbureve, fantazmë
Redaksia e “Boldnews.al” kërkoi të merrte një prononcim për këto të dhëna nga Shoqata e Hidrokarbureve. Kjo shoqatë, e regjistruar prej vitesh, deklaron se mbron interesat e kompanive private që operojnë në fushën e naftës dhe shqetësimet për kontrabandë, si rregull duhet të cënojnë aktivitetin tregtar të tyre, pasi godet drejtëpërdrejtë konkurencën e lirë dhe të ndershme.
“Boldnews.al u përpoq të gjente mundësi kontakti me Shoqatën e Hidrokarbureve nëpërmjet burimeve të hapura. Por, nga kërkimi rezultoi se kjo shoqatë nuk ka as faqe internet dhe as ndonjë kontakt tjetër publik.
Redaksia kontaktoi në rrugë telefonike kryetarin e Shoqatës së Hidrokarbureve, Luigj Aliaj, ku iu kërkua një adresë ose pikë kontakti për të dërguar disa pyetje për prononcim.
Zoti Aliaj u përgjigj nëpërmjet mesazhit telefonik se “Jam diku larg. Nuk kam as kohën, as mundësinë të merrem me këto çështje për ca kohë”.
Ky komunikim tregon më së miri se Shoqata e Hidrokarbureve, e cila duhet të përfaqësojë grupimin e bizneseve që janë në top-listën e qarkullimit të parave, është një grupim i tipit “fantazmë”, pa zyra, pa kontakt, pa staf. Ajo ka vetëm një kryetar, i cili, në rast pamundësie objektive për t’u angazhuar, bën që Shoqata e Hidrokarbureve të jetë “pa zë e pa figurë”.
Gjithësesi, duhet pranuar se Shoqata e Hidrokarbureve, më saktë kryetari i saj, Luigj Aliaj, është i pranishëm herë pas here në media, sidomos kur i është dashur të justifikojë rritjet e çmimit të karburanteve nga qeveria.
