Kreu i PD-së, Sali Berisha gjatë fjalës ës mbajtur në tubimin e sotëm është ndalur dhe tek denoncimi në lidhje me projektin për rehabilitimin e lumit Lana nga “Pallati me Shigjeta” tek kryqëzimi i Astirit.
Berisha pretendon se me anë të këtij projekti do të grabiten nga kryebashkiaku Erion Veliaj, ministri Taulant Balla dhe biznesmeni trafikant Edmond Bego 40 metër katrorë tokë për të ndërtuar kulla, ku projekti prek prishjen e shumë banesave.
Lideri i opozitës u bëri thirrje demokratëve të degës së zonës por edhe të degëve të tjera të PD-së në Tiranë që të bëhen gati për betejë për të ndaluar grabitjen e tokës, duke paralajmëruar kështu protesta.
Berisha: Të dashur miq, katër ditë më parë, dy hajdutët më të mëdhenj të kombit, Edi Rama dhe Erion Veliaj paraqitën para qytetarëve dhe medias, projektin madhështor të Lanës.
Këto ditë, qytetarët e Tiranës më informojnë se prapa këtij projekti qëndron grabitja e 40 mijë metër katror tokë nga Edmond Bego, Erion Veliaj dhe krimineli Taulant Balla për të ndërtuar 40 mijë metër katrorë kulla.
Kryehajduti i Tiranës, Erion Veliaj, Edi Rama me supertrafikantin Edmond Bego dhe Taulant Ballën, kanë vendosur të prishin 300 banesa, biznese, t’i rrafshojnë, por kjo nuk do të ndodhë kurrë.
Degët e PD në zonë dhe degët e tjera në Tiranë, të përgatiten për betejën me të fuqishme. Asnjë banesë nuk do mund të preket nga këta kriminelë të narkoshtetit që rrafshojnë pallate dhe shtëpi banimi, rrafshojnë biznese për të ngritur monumentet e krimit dhe drogës së tyre.
Këta njerëz, këta qeveritarë nuk kanë asnjë interes tjetër përveç interesave mafioze.
