Nga Boldnews.al
Në filmin “Njeriu me top” Agushi një pjesëtar i ushtrisë së shpartalluar fashiste italiane në Shqipëri, për të mbajtur frymën gjallë fillon të shërbej si hyzmeqar në shtëpinë e një fshatari të pa shkollë si Mato Gruda. Sigurisht i rregulluar dhe i parë nën frymën e realizmit socialist vihet re se Agushi dinte ca gjëra por ishte inferior ndaj moralit të Mato Grudës, baza mbi të cilën komunizmi prodhoi atë që dimë në 5 dekadat e ardhshme të Shqipërisë.
Këto ndjesi neveritëse të krijoheshin edhe sot në konferencën për shtyp të kryeministres italiane Xhorxhia Meloni përpara Kryeministrit të Shqipërisë Edi Rama. Meloni njësoj si Agushi i filmit pranoi se në Itali ka mafie dhe me emra përkatës si Cosa Nostra, Ndragheta etj, po kur erdhi puna për të fol për Shqipërinë e cila në çdo rast si çdo vend tjetër është pjesë e lëvizjeve të krimit të organizuar, befas Meloni na tha se këtu s’ka mafie, s’ka krim, s’ka asgjë.
E zënë në hall ndoshta për shkak të premtimeve të pambajtura ndaj elektoratit të saj dhe shpikjes për ta kthyer Shqipërinë në një kamp për refugjatët italian, Meloni njësoj si Agushi ishte gati t’i thurte lavde të panumërta Mato Grudës. Vetëm se për të qenë të ndershëm Edi Rama nuk është Mato Gruda në film pasi për nga dinakëria ndoshta duhet ta krahasojmë më Torsun Baçin nëse i qëndrojmë personazheve të filmit.
Imagjinoni një çast sikur Agushi të ishte hyzmeqar të zotit Torsun… Me siguri nuk do hante vetëm gjizë pasi zoti Torsun do e dridhte e spërdridhte sipas qejfit dhe dinakërisë së vetë.
Amerikanët kanë një shprehje “nuk ka drekë falas” në këtë rast Rama tregoi që si mori falas refugjatët. Ai e solli Melonin duke e kthyer në një “dordolec” për t’i krehur bishtin atij. Ishte një Meloni e vogël në krah të Ramës së madh. Kryeministrja e Italisë së madhe nuk la rast pa e baltosur vendin e saj, ndërkohë që pastronte “këpucët” e kryeministrit të Shqipërisë së vogël.
Në fund të fundit si te filmi lufta mbaroi dhe Agushi iku në shtëpinë e vet ashtu edhe Meloni erdhi na tha ca broçkulla dhe iku në vendin e vet. Ne do vazhdojmë të kemi Ramën, ndërsa italianët me siguri do ja japin një “sinjal” Melonit në zgjedhjet e radhës.
