Kreu i grupit parlamentar të PD-së, Gazment Bardhi ka reaguar pasi SPAK rrëzoi padinë e Olsi Ramës, vëllait të kryeministrit Edi Rama, ndaj tij, ku e akuzonte për shpifje në lidhje me akuzat që e implikojnë atë si të përfshirë në grupin e trafikantëve të laboratorit të kokainës në Xibrakë
Në një postim në rrjetet sociale, Bardhi shkruan se Edi Rama nuk mund të fshihet më dhe sipas tij, me këtë vendim është rrëzuar edhe refuzimi i tij për të dhënë shpjegime në Kuvend.
Bardhi shprehet më tej se nuk ka më vend për vonesa, zvarritje apo fshehje për të hetuar rolin e Olsi Ramës në organizatën e trafikut të drogës së Xibrakës. Ai i ka bërë thirrje SPAK-ut që heqë pezullimin ndaj procedimit penal nr. 335/1-2016 dhe se duhet të na provojë që në Shqipëri nuk ka persona të paprekshëm.
Sipas Bardhit, provat janë aty, duhet vetëm të hiqet pluhuri që ka zënë atë dosje të lënë në harresë. Ai deklaron se kq duhet dhe më pas zotimi i Edit të vogël, “ose unë ose ai në burg”, merr përgjigje vetiu.
Reagimi i Bardhit:
Edi Rama nuk mund të fshihet më! Pretendimi i tij se nuk jep shpjegime në Kuvend, sepse kërkuesi i interpelancës është kallëzuar në SPAK, është rrëzuar më 17 Prill.
Nuk ka ndodhur kurrë të kem bërë denoncim të pabazuar në të dhëna konkrete, fakte konkrete apo dokumente zyrtare. Prandaj, pasi u fsheh pas Olsit për 1 muaj, fitoi kohë për të gjetur alibi e gënjeshtra, sot Edi Rama ka detyrimin të shpjegojë çfarë e lidhte Olsi Ramën me kreun e narko-organizatës dhe pse krerët e organizatës, bashkë me vëllain e tij Olsi Ramën përdorin të njëjtin automjet me targa AA 653 DM, në të njëjtën periudhë të planifikimit dhe ngritjes së laboratorit të kokainës në Xibrakë?
Nuk ka më vend për vonesa, zvarritje apo fshehje për të hetuar rolin e Olsi Ramës në organizatën e trafikut të drogës së Xibrakës. Prandaj ripërsëris kërkesën për heqjen e pezullimit ndaj procedimit penal nr. 335/1-2016. SPAK duhet të na provojë që në Shqipëri nuk ka persona të paprekshëm, që hetohet dhe vihet përpara përgjegjesisë cilido, qoftë ky edhe vëllai i Kryeministrit. Prova janë aty, duhet vetëm të hiqet pluhuri që ka zënë atë dosje të lënë në harresë. Kaq duhet dhe më pas zotimi i Edit të vogël, “ose unë ose ai në burg”, merr përgjigje vetiu!
“Olsi te Xibraka”/ SPAK rrëzon vëllain e Ramës, nuk pranon padinë për shpifje ndaj Bardhit
