Një tjetër rast i dhunës ndaj fëmijëve në kopsht privat është denoncuar në media pak ditë pas atij në zonën e “Ali Demit” në kryeqytet.
“JOQ” ka publikuar këtë të enjte denoncimet e një nëne në Durrës, e cila ka rrëfyer se e bija është dhunuar nga edukatorja në kopsht.
Ajo dëshmon për dy raste. I pari i përket në muajin Korrik, ku denoncuesja thotë se edukatorja e kopshtit e kishte mbyllur vajzën e mitur në banjë dhe i kishte shkulur flokët. Në lidhje me rastin, rrëfen se ka vënë në dijeni drejtoreshën e kopshtit, ndërsa kjo e fundit i ka thënë se në tualet nuk ka kamera dhe për këtë arsye nuk mund të verifikohet ngjarja.
Rasti i dytë, sipas denoncueses, është regjistruar në Shtator, kur një tjetër edukatore e ka qëlluar me shpullë vogëlushen. E ëma e vajzës është shprehur se ka parë pamjet filmike të kamerave kur ndaj 5-vjeçares është ushtruar dhunë, por institucioni nuk i ka lejuar t’i marrë. Ajo shton se ka vënë në dijeni drejtoreshën e kopshtit për rastin teksa kjo e fundit i ka thënë se edukatorja është pushuar nga puna.
Denoncuesja vë në dispozioicion të medias edhe një komunikim me edukatoren e akuzuar se përdori dhunë, teksa kjo e fundit i kërkon falje.
View this post on Instagram
Rasti i “Ali Demit”, zinxhiri i paligjshmërisë
Rasti i dhunës në kopshtin “Stinët” në zonën e “Ali Demit” në kryeqytet u zbulua në emision “Stop” dhe solli jo vetëm indinjatën e opinionit publik, por zbuloi një zinxhir paligjshmërie.
Edukatorja e akuzuar për dhunë, Majlinda Dehima u procedua për veprën penale të keqtrajtimit të të miturve.
Kopshti privat u mbyll pasi institucionet konstatuan se funksiononte pa licencë, njoftoi Ministria e Arsimit. Pronari i biznesit u procedua për ushtrim të aktivitetit pa licencë, fshehje e të ardhurave dhe mospagim të taksave dhe tatimeve.
Këtë të enjte, Agjencia e Mbikëqyrjes Policore njoftoi kallëzon në prokurori te shefit të krimeve në komisariatin 1 si dhe një specialist në këtë sektor. Të dy akuzohen për “Shpërdorim detyre”. Sipas AMP, “ka dyshime se punonjësit e Policisë nuk kanë kryer veprime të plota hetimore për vënien para përgjegjësisë ligjore të personave që kanë kryer keqtrajtimin e të miturës në ambientet e kopshtit “Stinët” në datë 1 nëntor”.
Ndërkohë me urdhër të Drejtorit të Përgjithshëm të Policisë së Shtetit janë pezulluar nga detyra dhe ka nisur hetim administrativ nga Drejtoria e Standardeve Profesionale për 3 oficerë policie.
