Kreu i Grupit Parlamentar të Partisë Demokratike, Gazment Bardhi ka komentuar aksionin opozitar ditëve të fundit të cilët kanë shkaktuar kaos duke mos lejuar normalitetin në Kuvendin e Shqipërisë derisa mazhoranca të aprovojë kërkesat e tyre për ngritjen e 3 komisioneve hetimore.
Bardhi deklaroi se situata do të përshkallëzohet edhe më keq, duke shtuar se “çka është parë deri më tani, nuk është asgjë”.
“Do shikoni se si ne do ta përshkallëzojmë aksionin tonë”, tha ai në News 24.
Gazment Bardhi: “Kryesia e Kuvendit është godina e Parlamentit ku mazhoranca ka ambientet e veta dhe opozita po ashtu. Ato janë zyra të shtetit shqiptar, që sipas numrave në Parlamentin e Shqipërisë, i janë vënë në dizpozicion.
Unë kam qenë duke shkuar, ajo dritare që shikoni është dritarja e sallës së grupit të PD-së.
Ku është parë që mos të lejohet opozita të mos hyjë. S’mund të shkoj unë në zyrën time, në sallën e konferencave që të komunikoj me gazetarët. Nuk pengohet kryetarin e grupit parlamentar të opozitës të shkojë në zyrën e tij të punës.
Si mund të ndalosh deputetët e opozitës të marrin pjesë në mbledhjet e grupit parlamentar. Unë kam 30 ditë i përjashtuar nga parlamenti, dhe kam hyrë normalisht në zyrën time. Ajo masë është e datës 31 Tetor.
Çfarë ndryshoi sot? Ajo që ju patë ishte një pasojë e këtij veprimi arbitrar të paligjshëm, me urdhër të Edi Ramës, për të mos lejuar kolegët e opozitës të zhvillojnë mbledhjen e grupit. Kjo që keni parë deri më tani nuk është asgjë. Do shikoni se si ne do ta përshkallëzojmë aksionin tonë. Sepse ne nuk jemi rrogëtar të qeverisë, askush nuk mund të na trajtojë ne sikur na kanë dhuruar mandatet. T’i heqësh të drejtën opozitës që të hetojë në Parlament edhe korrupsionin e Edi Ramës, po për çfarë shkojmë në Parlament ne?”
