Partia Socialiste refuzon ngritjen e komisioneve të posaçme parlamentare për të hetuar dyshimet e vjedhjes së të dhënave të sistemit TIMS dhe koncesionet në shëndetësi.
Këtë të premte, në Konferencën e Kryetarëve u shqyrtuan dy kërkesat e Partisë Demokratike për komisione hetimore. E para lidhet me dyshimet për vjedhjen e të dhënave nga sistemi TIMS nga zyrtarë të policisë. E dyta ka të bëjë me koncesionet në fushën e shëndetësisë, për të cilat opozita thotë se janë korruptive dhe i kanë shkaktuar një dëm të konsiderueshëm buxhetit të shtetit.
Për të dyja rastet, Partia Demokratike ka shprehur domosdoshmërinë për hetim përmes komisioneve të posaçme parlamentare, në përpjekje për të hedhur më shumë dritë mbi çështjet.
Megjithatë, nuk ishin të të njëjtit mendim socialistët. Deputetët e PS-së në mbledhjen e sotme, që përbëjnë edhe shumicën, kanë rrëzuar kërkesat e opozitës.
Në një deklaratë nga salla e konferencave të kryesisë së Kuvendit, deputeti demokrat Gazment Bardhi e cilësoi antikushtetues rrëzimin e kërkesave të PD nga mazhoranca.
“45 deputetë ju drejtuam Kuvendit për ngritjen e një Komisioni Hetimor. Sipas Kushtetutës, Kuvendi është i detyruar kur e kërkojnë jo më pak se 35 deputetë. Pa asnjë surprizë, siç kanë vepruar për një 1 vit e gjysmë, mazhoranca vendosi të mos japë konsensusin për ngritjen e Komisionit Hetimor, është antikushtetuese sepse Kuvendi e ka detyrim. Argumenti i parë nga kolegët e mazhorancës, lidhej me faktin se ne kërkonim 4 kontrata dhe e konsideruan shumë të gjerë si çështje, se ata kanë shumë punë. Në fakt të 4 kontratat lidhen me një çështje të vetme, me ofrimin e shërbimeve ndaj qytetarëve. Për aq kohë sa janë miratuar nga qeveria me vlerë 450 mln euro, ne propozuam që të verifikohet, së pari si janë lidhur kontrata dhe si do zbatohen. Të dhënat e verifikimit nga Kontrolli i Lartë i Shtetit kanë provuar për pagesa për shërbime që qytetaret nuk i përfitojnë”, tha Bardhi.
“Ndërsa për sistemin TIMS, që s’ka qenë thjesht shqetësim nga ne por nga SHBA, ne e kuptojmë që Rama dhe mazhoranca nuk ka interes të zbulohet, kjo gjë sepse do të provohej fshehja e udhëtimeve të eksponentëve politike me eksponentë të krimit të organizuar. Kjo ka qenë arsyeja e ndërhyrjes në TIMS”, shtoi kreu i grupit parlamentar të PD.
Përgjatë viteve, mazhoranca ka mbajtur kryesisht një qëndrim refuzues ndaj komisioneve hetimore parlamentare të kërkuara nga opozita. PS ka refuzuar kërkesa për ngritje të komisioneve për shpenzimet e udhëtimeve me avion të kryeministrit Edi Rama, për çështjet “Becchetti”, “McGonigal”, etj.
