Ferdinand Dervishi, gazetari i cili denoncoi vjedhjen e të dhënave të sistemit TIMS, shprehet se urdhëruesit dhe zbatuesit e veprës po tentojnë të pajisen me certifikata sigurie për ti shpëtuar hetimit.
Në një postim në FB, ai shkruan se ka nisur presoni ndaj institucionit që lëshon këto certifikata për të pajisur me to personat e dyshuar të vjedhjes së të dhënave edhe pse hetimi ndaj tyre e pengon një gjë të tillë.
“Perpjekja shteterore per te zvogeluar sulmin kriminal ndaj sistemit TIMS kthehet ne dhimbje koke per urdheruesit dhe autoret. Te gjitha baterite tani jane fokusuar te AKSIK (Agjencia Kombetar per Sigurine e Informacionit te Klasifikuar) ose ish DSIK, duke e vene nen presion te leshoje urgjentisht certifikata sigurie per ‘ekipin e ri’ te sigurise kibernetike te T. Balles. Presioni behet sidomos per leshimin e certifikates se sigurise per te akuzuarin kryesor per sulmin ndaj sistemit TIMS, te cilin e pengon marrja nen hetim per skandalin e vjedhjes dhe berjes publike e te dhenave te pagave nga databaza e tatimeve”, shkruan Dervishi.
Më tej, ai shton se presion po behet edhe për pajisjen me certifikatë sigurie të shefes së re të Akntikrimit Kibernetik, e hetuar në vitin 2014 për vjedhjen e hard- drive të kompjuterit personal, teksa punonte si specialiste në Drejtorinë e Teknologjisë dhe Informacionit në Ministrinë e Brendshme.
“Nuk dihet nese dy te siperpermendurit i kane deklaruar apo fshehur bemat e tyre antiligjore ne formularet qe AKSIK kerkon. Nderkohe perpara 6 oresh Ambasada Amerikane serish doli me nje njoftim publik ku konsideronte si thelbesore mbeshtetjen e SHBA per sigurine kibernetike ne Shqiperi”, e mbyll reagimin e tij gazetari.
Më herët, ambasada amerikane ka shprehu publikisht shqetësim për çështjen përmes një deklarate publike, ndërsa përfaqësuesi i ambasadës zhvilloi një takim me ministrin e Brendshëm Taulant Balla.
Ndërkohë, një hetim ka nisur nga Agjencia e Mbikëqyrjes Policore që ka referuar materialet në prokurorinë e rrethit.
Denoncime publike lidhur me rastin ka bërë dhe Partia Demokratike, që është shprehur se vjedhja u krye nga drejtori i Departamentit të Teknologjisë së Informacionit, Ervin Muça, që më pas u pezullua nga detyra. Sipas PD-së, ai eksportoi të gjithë bazën e të dhënave të TIMS në një harddisk të jashtëm ndërsa për të kryer këtë akt ka përdorur punonjës të dy kompanive private të IT Soft & Solution të Ermal Beqirit, dhe kompaninë “Horizon”, të cilët kishin shkuar gjatë orarit të pasdites pranë laboratorit të DTI-së, në rrugën “Mine Peza” dhe kishin kryer eksportin e të dhënave.
Sipas opozitës, databazën e të dhënave te sistemit TIMS e kanë eksportuar në Qipro dhe gjatë eksportit kanë qenë të pranishëm nga DTI e Policisë, Albana Vrapi nga Sektori i databazës, Enkli Hoxha nga Sektori i serverave, Egis Hidri nga Sektori i Serverave, Xhulja Çollaku nga Sektori i Serverave, Elvis Hysi nga Sektori i Serverave.
Ministri Balla ka tentuar të zhvlerësojë rëndësinë e çështjes, ndërsa është shprehur se ka qenë ai që ka kërkuar “që të dhënat që ka disponuar agjencia e mbikëqyrjes policore të vlerësohen edhe nga ana e prokurorisë nëse ka ndonjë element”.
