Caktimi nga Kuvendi i datës 2 Mars për zhvillimin e mocionit me debat me kryeministrin Edi Rama për çështjen McGonigal, solli edhe mbylljen e protestës para parlamentit.
Pas njoftimit të vendimit nga drejtuesja e seancës plenare Ermonela Felaj, kryetari i PD-së Sali Berisha i cili ishte mes protestuesve, tha: “Tani, le të betohemi këtu, në emër të të gjithë atyre që përfaqësojmë, po nuk u bë mocioni me debat në parlament, do bëhet në Surrel”.
“Paqësor, urtë e butë! Por simboli, shpella e të keqes është Surreli. Ai nuk pranon të vijë këtu, ndaj ne do shkojmë aty ku struket ai. Paqësisht do ia numërojmë të gjitha këto të mocionit. Surreli do jetë objekt i revolucionit paqësor. Shkojmë aty karshi dhe i themi: kemi 13 pyetje o sulltan. Revolucioni nuk ndalet, por të jeni të sigurt që do fitojmë”, shtoi ai.
Më tej, protestuesit u shpërndanë, ndërsa disa prej tyre ndoqën kreun e PD-së për në selinë blu, ku ai mbajti dhe një fjalim. Berisha tha mes të tjerash se revolucioni vazhdon, ndërsa shtoi se në protesën kombëtare më 3 Mars, “bashkohen të gjithë shqiptarët kundër këtij regjimi, që po vjedh pa dallim”.
Protesta që nisi rreth orës 10:00 zgjati për gati 2 orë e 30 minuta dhe ishte e qetë. Deputetë e ish-deputetë të opozitës mbajtën disa fjalime. Mes tyre ishte dhe kreu i PL-së Ilir Meta, ish-kryetarja e Parlamentit Jozefina Topalli, deputeti Flamur Noka, kreu i PD-së Sali Berisha, e të tjerë.
“Ky revolucion nuk është revolucion i PD. Në të vërtetë është një lëvizje e fuqishme shqiptare. Është një revolucion shqiptar, i çdo shqiptari…”, theksoi Berisha gjatë fjalës së mbajtur në protestë.
Seanca e sotme plenare nisi me tensione mes deputetëve të opozitës dhe punonjësve të sigurisë në Kuvend. Nga efektivët e gardës nuk u lejuan të futen në Kuvend deputetët e përjashtuar më herët nga komisioni i Etikës së Kuvendit, të cilët iu bashkuan protestës para parlamentit.
Kryeministri Edi Rama zgjodhi të bojkotonte seancën plenare për të katërtën herë radhazi.
