Figura të politikës shqiptare kanë reaguar në lidhje me tërmetin vdekjeprurës 7.8 ballë, duke shprehur solidaritet për Turqinë dhe Sirinë.
Tërmeti vdekjeprurës me më shumë se 670 të vdekur, goditi dhjetë qytete në rajonin Kahramanmara të Turqisë, përfshirë Hatajin, ku shumë ndërtesa u shembën.
Kryetari i Partisë së Lirisë, Ilri Meta me anë të një postimi ka shprehur përkrahje për familjet e dëmtuara.
’Në këto momente shumë të vështira të përballjes me tërmetin shkatërrimtar që goditi natën e mbrëmshme, lutjet tona shkojnë për viktimat e shumtë që humbën jetën tragjikisht, duke shpresuar për sa më pak viktima të tjera në njerëz dhe një shërim të shpejtë të të plagosurve.’- shkruan Meta.
Po ashtu dhe kryetari i Partisë Demokratike, Sali Berisha ka reaguar pwr tërmetin 7,8 ballë që goditi Turqinë në orët e para të mëngjesit të sotëm. Përmes një postimi në rrjete sociale, Berisha ka shprehur ngushëllimet më të ndjera familjeve të viktimave dhe autoriteteve të vendit.
“Të dashur miq, një tërmet i rëndë 7,8 shkallësh ka goditur Turqinë qendrore dhe ne Sirinë verilindore duke shkaktuar qindra viktima dhe mijëra të plagosur. Me këtë rast duke shprehur ngushëllimet më të ndjera familjeve të viktimave, autoriteteve të vendit, lutemi për shërimin e shpejtë të të plagosurve”, shkruan Berisha.
Dhe ish kryetari i Partisë Demokratike, Lulzim Basha ka shprehur ngushëllimet për tragjedinë.
“I tronditur nga raportet për humbjet shkatërruese të jetëve në #Turkiye. Mendimet dhe lutjet e mia janë me viktimat, të lënduarit dhe familjet e tyre. Shqiptarët solidarizohen me popullin e #Turkiye në këto orë tragjike. #tërmet”– shkroi Basha.
Presidenti Bajram Begaj iu është bashkuar mesazheve ngushëlluese. Përmes një mesazhi, Begaj pohoi se lutjet e shqiptarëve shkojnë për popullin turk.
“Thellësisht i trishtuar nga tërmeti shkatërrues që goditi Turqinë dhe Sirinë këtë mëngjes. Unë dhe shqiptarët qëndrojmë pranë njerëzve të prekur dhe familjeve që humbën të dashurit e tyre në këtë tragjedi të tmerrshme. Mendimet dhe lutjet tona të sinqerta janë me ata!”, shkruan Begaj.
Një mision shpëtimi nga Shqipëria solidariteti do të niset sot për në Turqi njoftoi kryeministri Edi Rama.
“I pikëlluar thellësisht për lajmin e mëngjesit të sotëm për tërmetin shkatërrues që goditi disa pjesë të Turqisë dhe Sirisë. Ngushëllimet tona më të thella për familjet e shumta që humbën jetën dhe u urojmë shërim të shpejtë të lënduarve. Një mision shpëtimi solidariteti do të niset sot për në Turqi”, shkruan Rama.
Ministrja për Europën e Punët e Jashtme Olta Xhaçka, në një reagim në Twitter, ka shprehur ngushëllimet për viktimat e tërmetit tragjik që tronditi Turqinë dhe Sirinë.
“Lutjet tona shkojnë për viktimat e tërmetit tragjik që goditi Turqinë dhe Sirinë sot duke shkaktuar qindra viktima. Në këtë moment të vështirë ne jemi të gatshëm të ndihmojmë Turqinë në çdo mënyrë që mundemi.”, shkruan Xhaçka.
“Tronditje dhe trishtim për qindra viktima dhe mijëra të plagosur që shkaktoi tërmeti shkatërrimtar i këtij mëngjesi, në Turqi dhe Siri. Jemi me zemër dhe mendje pranë familjeve të viktimave, shërim të shpejtë të lënduarve”, shkruan Niko Peleshi në Twitter
Partia për Drejtësi, Integrim dhe Unitet është solidarizuar me ngjarjen tragjike të ndodhur në Turqi.
PDIU shprehet se “nuk do të harrojmë asnjëherë mbështetjen e madhe dhe solidaritetin e popullit turk dhe qeverisë së tyre në ditët më të vështira, kur vendi ynë u godit nga tërmeti në vitin 2019, ndaj dhe sot jemi pranë tyre me të gjitha mundësitë”.
Në mesazhin e ngushëllimit Kryetarja e Kuvendit, Lindita Nikolla, shpreh ngushëllimin e saj për viktimat.
“Të gjithë jemi të tronditur e hidhëruar nga lajmi për tërmetin shkatërrimtar në disa qytete të Turqisë Juglindore, për mbi pesëqind viktimat që humbën jetën, të lënduarit e të bllokuarit si edhe rrënimin e banesave të shumta. Në emër të Kuvendit të Shqipërisë, ndaj dhimbjen me Kryetarin e Asamblesë së Madhe Kombëtare të Turqisë, z. Mustafa Şentop, me familjet e viktimave e të të dëmtuarve dhe popullin turk. Lutemi për ju dhe ju jemi pranë në këto ditë të rënda. Solidaritet, kurajo e forcë për të përballuar pasojat e kësaj goditjeje të natyrës!” – shkroi ajo.
