Gjykata e Apelit në Tiranë ka hequr masat e sigurisë për pesë punonjësit e IT-së, nga Ministria e Brendshme dhe Departamenti i Administratës Publike që akuzohen për shpërdorim detyre.
Konkretisht bëhet fjalë për punonjësit e IT-së, Alketa Sulo, Altin Sallaku, Rudina Llagami, Igli Lubonja, Albi Gjeka, të cilët tashmë janë pa asnjë masë sigurie. Ata akuzohen se kanë shpërdoruar detyrën, pasi duhet të kërkonin raportim nga operatori ekonomik që ishte përgjegjës për situatën e sigurisë në faqen e administrata.al edhe për antiviruset që përdoreshin për mbrojtjen e kësaj faqeje.
“Referuar raportimeve te mëparshme ne media, lidhur me procedimin penal për sulmin kibernetik në pajisjet dhe sistemet që administrohen e menaxhohen nga AKSHI, mbi kërkesat e prokurorit, Gjykata e Rrethit Gjyqësor Tiranë, ka caktuar ndaj personave nën hetim Znj. A. S., Z. I. L., Znj. R. Ll., Z. A. S. masën e sigurimit personal ‘detyrim për tu paraqitur në policinë gjyqësore’, si të dyshuar për veprën penale të ‘shpërdorimit të detyrës’. Mbi ankimet e personave nën hetim të sipërcituar, Gjykata e Apelit Tiranë, e përbërë nga gjyqtari Z. Genti Shala, me vendimet respektive të datës 22.12.2022, vendosi të shfuqizojë vendimet e marra nga gjykata e shkallës së parë për caktimin e masës së sigurimit”, njofton gjykata e Apelit.
Sipas Prokurorisë, mos veprimi nga ana e punonjësve të IT-së duke shpërdoruar detyrën, ka bërë që sulmi kibernetik i kryer nga Irani, të mos zbulohej në kohë. 5 punonjësit e IT-së u identifikuan nga vetë strukturat e AKSHI-it. Këta persona me mosveprimet e tyre kanë sjellë pasoja të rënda dhe kanë konsumuar elementet e figurës së veprës penale të “Shpërdorimit të detyrës”.
5 punonjësit e IT-së nën akuzë për shpërdorim detyre
- Alketa Sulo – Specialist, Sektori i IT në Departamentin e Administratës Publike, Përgjegjës, Sektori i IT në Ministrinë e Brendshme;
- Altin Sallaku- Përgjegjës, Sektori i IT në Departamentin e Administratës Publike, Përgjegjës, Sektori i IT në Drejtorinë e Përgjithshme të Burgjeve;
- Rudina Llagami- Specialist, Sektori i IT në Departamentin e Administratës Publike;
- Igli Lubonja – Specialist, Sektori i IT në Departamentin e Administratës Publike; dhe
- Albi Gjeka – Specialist, Sektori i IT në Departamentin e Administratës Publike.
Sulmet kibernetike
Që prej vitit 2021, Shqipëria ka rënë pre e disa sulmeve kibernetike. Një sulm kibernetik u shënua më 15 korrik të këtij viti, që bllokoi të gjitha faqet zyrtare shtetërore dhe platformën e shërbimeve online e-Albania.
Ndërkohë, më 14 shtator u sulmua sistemi TIMS në të gjitha pikat kufitare të vendit. Për këto sulme Shqipëria ka fajësuar Iranin dhe ka ndërprerë marrëdhëniet diplomatike me këtë shtet.
Hakerat iranianë kanë publikuar pak kohë më parë edhe të dhënat e kryeministrit Edi Rama, kreut të SHISH, Helidon Bendo dhe bashkëshortes së tij, ish-drejtorit të policisë Gledis Nano, të nëndrejtorit të SHISH, Oljan Kanushit, dhe drejtorit të Përgjithshëm të Policisë së Shtetit, Muhamet Rrumbullakut.
Në skedën e shpërndarë në aplikacionin e komunikimit “Telegram”, janë të dhënat personale të tyre, informacion mbi përbërjen familjare, të dhënat e letërnjoftimeve dhe pasaportave. Numrat e celularit, vendbanimi dhe një listë me hyrje-daljet nga territori i vendit, pikat e kalimit, datat kur është kaluar kufiri dhe dokumentet që ka paraqitur te autoritetet doganore.
Më pas hakerat iranianë publikuan edhe listat e punonjësve të SHISH si dhe të punonjësve të policisë.
