Grupi “Homeland Justice” ka publikuar këtë të Diel në “Telegram” një folder me mail-e nga posta elektorike e kreut të SHISH, Helidon Bendo.
“Çdo organizatë qeveritare ose joqeveritare që mbështet MEK-un do të jetë në shënjestër nga ne”– shkruajnë hakerët.
Kujtojmë se pak kohë më parë ata publikuan një skedë me të dhëna personale të kreut të SHISH Helidon Bendo, ndërsa më pas edhe të bashkëshortes së tij.
Në skedën e shpërndarë në aplikacionin e komunikimit “Telegram”, janë të dhënat personale të kreut të SHISH Helidon Bendo dhe bashkëshortes së tij, informacion mbi përbërjen familjare, të dhënat e letërnjoftimeve dhe pasaportave. Numrat e celularit, vendbanimi dhe një listë me hyrje-daljet nga territori i vendit, pikat e kalimit, datat kur është kaluar kufiri dhe dokumentet që ka paraqitur te autoritetet doganore.
Vetëm pak ditë parë, hakerët publikuan edhe disa pamje video, për të cilat shpjeguan se janë materiale që janë filmuar nga Shërbimi Informativ Shtetëror.
Më 3 nëntor, po ashtu, publikuan një listë me punonjësit e SHISH, në një dokument prej 16 faqesh.
Në të shënohen emrat, që sipas hakerave janë pjesë e organikës së SHISH dhe funksionet përkatëse. Shumë prej tyre, siç thuhet në dokument, janë pjesë e fushës së kundërzbulimit dhe kundërspiunazhit, apo njësisë “Hunter & Ghost”.
Krahas emrave dhe funksioneve përkatëse, publikohet edhe e-maili. Për disa, janë të afishuara edhe numrat e telefonit.
Disa javë më parë, grupi “Homeland Justice” publikoi një listë me fluturimet e kreut të qeverisë Edi Rama, që shkaktoi debat, me opozitën që e akuzoi kryeministrin për shpërdorim të parave publike dhe kërkoi ngritjen e një komisioni hetimor.
Hakerat kanë publikuar një sërë informacionesh të tjera. Mes tyre edhe disa dokumente të klasifikuara sekret që dyshohet se u hakëruan nga posta elektronike e ish-kreut të Policisë së Shtetit Gledis Nano.
