Pas Kakavijës, sistemi TIMS është bllokuar edhe në Kapshticë.
Në dy pikat kufitare po punohet me regjistra me dorë për regjistrimin e hyrje daljeve nga kjo pikë kufitare, për ti hedhur më pas në sistem, me rikthimin e funksionalitetit.
Deri më tani nuk janë shfaqur radhë të gjata në dogana.
Dyshimet se sistemi TIMS është hakeruar, i konfirmoi kryeministri Edi Rama i cili bëri përgjegjës sërish Iranin.
“Një tjetër sulm kibernetik nga të njëjtët agresorë, tanimë të ekspozuar dhe dënuar prej vendeve aleate e mike të Shqipërisë, është shënuar mbrëmë mbi sistemin TIMS! Ndërkohë vazhdojmë punojmë përditë pa orar me aleatët për t’i bërë të papenetrueshme sistemet tona digjitale”, shkruan Rama në Twitter.
Sipas raportimeve mediatike, në kompjuterat e punonjësve është shfaqur një mesazh: “Shqipëria po vuan dhe do të vuajë ende, për përkrahjen që i ka dhënë iranianëve të MEK”.
Pak ditë më parë, kryeministri Edi Rama njoftoi ndërprerjen e marrëdhënieve diplomatike me Iranin dhe dëbimin e punonjësve të ambasadës iraniane në Tiranë. Shkaku, shpjegoi, lidhet me sulmin kibernetik të disa javëve më parë ndaj faqeve shtetëtore online. “Hetimi i thelluar na vuri në dispozicion prova të pakundërshtueshme, se agresioni kibernetik ndaj vendit tonë është orkestruar dhe sponsorizuar nga Republika Islamike e Iranit, e cila ka angazhuar katër grupe për sulmin ndaj Shqipërisë”, tha Rama.
Pas rënies së faqeve, një grup i vetëquajtur “Homeland Justice” (Drejtësi për Atdheun) pretendoi se ka qenë pas hakerimit të e-albania dhe faqeve të tjera shtetërore. Për ta pohuar këtë, ky grup publikoi në rrjetet sociale një folder brenda të cilit gjendeshin materiale të institucioneve më të rëndësishme të shtetit shqiptar. Justifikimi i sulmit të tyre u shpjegua nën parullën: “Pse duhet qe të shpenzohen taksat tona per terroristët e Durrësit”, duke iu referuar ish-muxhahedinëve iranianë (MEK) që janë strehuar në Manzë të Durrësit.
