Grupi “Homeland Justice”, që ka marrë përsipër autorësinë e dy sulmeve kibernetike ndaj faqeve online të institucioneve, ka publikuar këtë të Dielë disa të dhëna të tjera.
Në dy skedat e shpërndara në “Telegram”, janë të dhënat personale të nëndrejtorit të SHISH, Oljan Kanushit, dhe drejtorit të Përgjithshëm të Policisë së Shtetit, Muhamet Rrumbullakut.
Në skeda gjenden informacione mbi përbërjen familjare, të dhënat e letërnjoftimeve dhe pasaportave, numrat e celularit, vendbanimi, një listë me hyrje-daljet nga territori i vendit, pikat e kalimit, datat kur është kaluar kufiri dhe dokumentet që ka paraqitur te autoritetet doganore. Katër prej fluturimeve, Rrumbullaku rezulton t’i ketë kryer me çarter.
Krahas skedës së Muhamet Rrumbullakut, hakerët shkruajnë: “Ne jemi më afër jush sesa shpirtrat tuaj. Në vend që të zëvendësoni zyrtarët e institucioneve të korruptuara qeveritare, mendoni për reformimin e strukturës korruptive”.
Ndëra krahas skedës së Oljan Kanushit shkruajnë: “Çdo lëvizje dhe intervistë e drejtuesve të MEK në Shqipëri dhe vende të tjera do të ketë një çmim të rëndë për popullin shqiptar.”
Kujtojmë se pak kohë më parë ata publikuan një skedë me të dhëna personale të kreut të SHISH Helidon Bendo, ndërsa më pas edhe të bashkëshortes së tij.
