Hakerat vijojnë të publikojnë informacione sensitive të institucioneve shqiptare. Mbrëmjen e kësaj të Mërkure, “Homeland Justice”, që ka marrë përsipër autorësinë e dy sulmeve kibernetike ndaj faqeve online të institucioneve, ka publikuar në “Telegram” të dhëna të personave, që sipas tyre, janë punonjës së Shërbimit Informativ Shtetëror.
Bëhet fjalë për një dokument prej 16 faqesh. Në të shënohen emrat, që sipas hakerave janë pjesë e organikës së SHISH dhe funksionet përkatëse. Shumë prej tyre, siç thuhet në dokument, janë pjesë e fushës së kundërzbulimit dhe kundërspiunazhit, apo njësisë “Hunter & Ghost”.
Krahas emrave dhe funksioneve përkatëse, publikohet edhe e-maili. Për disa, janë të afishuara edhe numrat e telefonit.
Disa ditë më parë, grupi “Homeland Justice” publikoi një listë me fluturimet e kreut të qeverisë Edi Rama, që shkaktoi debat, me opozitën që e akuzoi kryeministrin për shpërdorim të parave publike dhe kërkoi ngritjen e një komisioni hetimor.
Hakerat kanë publikuar një sërë informacionesh të tjera. Mes tyre edhe disa dokumente të klasifikuara sekret që dyshohet se u hakërruan nga posta elektronike e ish-kreut të Policisë së Shtetit Gledis Nano. Publikimi erdhi pak pasi Rama do të deklaronte publikisht se hakerat nuk kanë arritur të marrin të dhëna sekrete.
