Një ceremoni u zhvillua këtë të Mërkurë në vendin ku do planifikohet të ndërtohet Teatri i Ri Kombëtar, 2 vite e gjysmë pas shembjes së godinës ekzistuese. Kryeministri Edi Rama dhe kryebashkiaku i Tiranës Erion Veliaj deklaruan se do të jetë “më i bukuri në rajon”. Nga ana tjetër “Aleanca për Mbrojtën e Teatrit” shprehu kundërshti për projektin, duke argumentuar se bie ndesh me një vendim të mëparshëm të Gjykatës Kushtetuese. Ndërkohë, opozita paralajmëroi se me këtë akt, po nxitet nga pushteti përplasja me qytetarët.
Trupa policore u vendosën që prej mëngjesit të kësaj të Mërkure në vendin ku ishte Teatri Kombëtar, i shembur në Maj 2020 mes tensionesh dhe kundërshtive të shumta, për të siguruar skenën e improvizuar nga e cila u fol për projektin e teatrit të ri.
Kryebashkiaku i Tiranës, Erion Veliaj u prit me revoltë, teksa një qytetare iu drejtua me fjalët: “O hajdut! O hajdut! Vjedh pronën e njerëzve. Do të të vijë dita!”.
Gjatë fjalës së tyre, si Veliaj ashtu dhe Rama deklaruan se projekti do të jetë “më i bukuri në rajon”, ndërsa kreu i qeverisë u mburr duke thënë se kishte arritur një marrëveshje të mirë financiare me arkitektin e projektit arkitektin Bjarke Ingels.
“Çfarë nuk ecën e keni me lali Erin, unë e mbarova timen”, u shpreh po ashtu Rama, i cili sulmoi dhe ata që kanë kundërshtuar shembjen e Teatrit Kombëtar dhe ngritjen e një të riu.
Aleanca: Nisja e punimeve kundër vendimit të Gjykatës Kushtetuese
Një prej tyre është “Aleanca për Mbrojtjen e Teatrit”, një grupin me artisë dhe aktivistë të cilët zhvilluan një nga protestat më të gjata, duke kundërshtuar shembjen e Teatrit Kombëtar, megjithëse rruspat nën urdhrat e pushtetit, e shkatërruan orët e para të mëngjesit të 17 Majit 2020.
Përfaqësues nga Aleanca për Mbrojtjen e Teatrit, u paraqitën ditën e sotme në Gjykatën Kushtetuese. Para gazetarëve, thanë se me nisjen e punimeve është cënuar vendimi i Kushtetueses për Teatrin.
“Kemi ardhur sot në Gjykatën Kushtetuese për të kërkuar konstatimin e vijimit të cenimit të vendimit të Gjykatës Kushtetuese, cenim i cili ka bërë mosekzekutimin e tij”, tha përfaqësuesja ligjore e “Aleancës për Teatrin”, e cila paralajmëroi rezistencë kundër vendimit për ndërtimin e teatrit të ri.
Për aleancën, teatri duhet të rindërtohet siç ka qenë.
Berisha: Veliaj po nxit përplasjen me qytetarët
Opozita po ashtu shprehet se me nisjen e punimeve, kryhet një dhunim flagrant i vendimit të Gjykatës Kushtetuese.
“Nga ky akt kalohet në një akt madhor, dhunimin flagrant të vendimit të Kushtetueses. Kjo është një sfidë e hapur, jo vetëm për Aleancën për Mbrojtjen e Teatrit, por për opozitën në radhë të parë. Opozitës i thuhet se nuk njohim norma, nuk njohim standarde, por jemi të gatshëm të ndërmarrim çdo akt, në kundërshtim të hapur me një vendim të Gjykatës Kushtetuese. Gjykata Kushtetuese ndalon procedimin e mëtejshëm në atë truall, ia kthen atë qeverisë. Ky është vendi i vetëm ku vendimet e Kushtetueses rrëzohen me vendime të banditëve qeveritarë. Ky është vendi i vetëm në botë ku një vendim i Gjykatës Kushtetuese rrëzohet me një vendim të qeverisë”, tha kreu i PD-së, Sali Berisha në një deklaratë për mediat.
Sipas tij, Erion Veliajn se me këtë akt ai po nxit përplasjen me qytetarët.
“Ndaj dhe unë, paralajmëroj Erion Veliajn se me këtë akt ai po nxit me të gjithë forcën, përplasjen me qytetarët. Ai është një kukull e Edi Ramës, por do përgjigjet për këtë akt. Paralajmëroj ndërtuesin që të mos bëhet mashë. Hiq dorë nga ai projekt. Populli opozitar nuk do e pranojë kurrë atë projekt. Populli opozitar do bëjë gjithçka për zbatimin e drejtë të vendimit të Kushtetueses”, shtoi Berisha.
Deputeti demokrat Luçiano Boçi paralajmëroi kallëzim në SPAK. “Ende pa u tharë boja, sot Rama dhe Veliaj provokojnë hapur me nisjen e punimeve për një teatër me kulla, që kundërshtohej nga Kushtetuesja. Ndaj SPAK duhet të veprojë, nëse jo, na bie si detyre qe te depozitojmë kallëzim në SPAK”, tha Boçi.
