Nisin sot punimet për ndërtimin e Teatrit të ri Kombëtar, ndërkohë forca të policisë kanë rrethuar sheshin e saj.
Në orën 10:30 pritet të jetë dhe kryeministri Edi Rama për të bërë dhe inaugurimin e punimeve. Prezent ka qenë edhe drejtori i ri i teatrit Altin Basha.
Ndërkohë, përfaqësues nga Aleanca për Mbrojtjen e Teatrit, thanë para gazetarëve nga Gjykata Kushtetuese se kanë kërkuar konstatimin e vijimit të cenimit të vendimit të Gjykatës Kushtetuese, cenim i cili ka bërë mosekzekutimin për pezullimin e punimeve.
“Kemi ardhur sot në Gjykatën Kushtetuese për të kërkuar konstatimin e vijimit të cenimit të vendimit të Gjykatës Kushtetuese, cenim i cili ka bërë mosekzekutimin e tij. Ky vendim i Gjykatës Kushtetuese jo vetëm është penguar, por nuk është lejuar ekzekutimi i tij. Nga ana tjetër kemi kërkuar pezullimi e të gjitha veprimeve antiligjore që po bën bashkia e Tiranës lidhur me fillimin e punimeve në sheshin e Teatrit Kombëtar, ndërkohë që nuk është ekzekutuar vendimi i Gjykatës Kushtetuese. Kemi kërkuar 34 here në SPAK, vendosjen e sekuestros mi truallin e Teatrit”, tha Adriana Kalaj, përfaqësuese ligjore nga “Aleanca për Teatrin”.
Ajo bëri të ditur se i janë drejtuar edhe Gjykatës së Strasburgut lidhur me ketë çështje.
“I jemi drejtuar edhe Gjykatës së Strasburgut, ku kemi kërkuar pezullimin e cenimit të ekzekutimit të vendimit të Gjykatës Kushtetuese duke e konsideruar si një proces të parregullt ligjor”.
Kalaja ka bërë thirrje “për të penguar punimet e Veliaj”.
“Tani do të shkojmë drejt sheshit, pasi siç e dini mafiozi qe drejton bashkinë e Tiranës ka deklaruar fillimin e punimeve, te vijnë aty se teatri ka qenë i të gjithëve, Ne me të gjitha mënyrat qoftë me betejën ligjore qofte me mënyrat tjerra do te qëndrojmë aty për të mos lejuar fillimin e punimeve dhe për të gjithë këto Erion Veliaj dhe ata që kanë firmosur do të përgjigjen para ligjit”, tha ajo.
Teatri Kombëtar u shemb në maj të vitit 2020 pas përplasjeve dhe kundërshtimeve të shumta të shoqërisë civile. Këshilli Kombëtar i Territorit i miratoi lejen teatrit në verën e vitit të kaluar, teksa kosto totale e tij llogaritet në 30 milionë euro. Projekti i parë që doli në publik parashikonte ndërtimin e disa kullave bashkë me Teatrin ndërkohë që më pas qeveria u tërhoq duke thënë se ky Teatër do të ndërtohej me para publike dhe nuk do të kishte ndërtesa shumëkatëshe bashkë me të.
