Davide Pecorelli, 46-vjeçari nga San Giustino, i cili u arrestua pasditen e së shtunës (10.12.2022) nga policia italiane me qëllim ekstradimi drejt Shqipërisë, do të lirohet nga burgu.
Gjykata e Perugias ka vendosur që kërkesa e Shqipërisë dhe prokurorisë Pukë për të ekstraduar biznesmenin italian Davide Pecorelli të shqyrtohet pa masë sigurie. Kështu Davide Pecorelli është lënë i lirë pas arrestimit që ju bë të shtunën me kushtin që mos largohet nga Italia për t’iu shmangur hetimit e gjykimit për ekstradim.
Pecorelli, i cili në janar 2021, besohej se kishte vdekur i djegur në Shqipëri brenda një Skoda Fabia të përpirë nga flakët, u shfaq nëntë muaj më vonë si një anije e mbytur në ujërat toskane të ishullit Montecristo, ndërsa përpiqej të ankorohej me gomone për të kërkuar thesarin.
Pecorelli akuzohet nga autoritetet shqiptare për mashtrim, deklarime të rreme, pengim të drejtësisë, dëmtim të pronës, zjarrvënie dhe kalim të paligjshëm të kufirit.
Ditën e shtunë, pas arrestimit të tij, reagoi edhe policia shqiptare, e cila tha se pritet ekstradimi i tij.
Njoftimi nga Policia shqiptare
Pas raportimeve nga mediat italiane, Policia shqiptare njoftoi se arrestimi i italianit erdhi falë shkëmbimit të informacionit mes policive të të dy vendeve, “47-vjeçari ishte i shpallur në kërkim ndërkombëtar, pasi Gjykata e Rrethit Gjyqësor Pukë, ka caktuar ndaj tij, masën e sigurisë “Arrest në burg”, për veprat penale: “Mashtrimi”, “Dhunimi i varreve”, “Veprime që pengojnë zbulimin e së vërtetës”, “Shkatërrimi i pronës me zjarr” dhe “Kalimi i paligjshëm i kufirit shtetëror”. Ky shtetas, në janar të vitit 2021, inskenoi ngjarjen e vrasjes së tij dhe djegies së trupit. Si rezultat i hetimeve të thelluara të kryera nga strukturat hetimore të Policisë së Shtetit shqiptar dhe Prokuroria e Pukës, në bashkëpunim me homologët italianë, u bë e mundur zbardhja e ngjarjes, si dhe lokalizimi i shtetasit D. P., në një ishull. Arrestimi i 47-vjeçarit, nga Policia italiane mbrëmjen e sotme në Perugia, u bë me qëllim ekstradimi drejt vendit tonë”, njoftoi policia.
