Anëtari i Kryesisë së PD-së Aldo Bumçi ka komentuar aktualitetin politik në vendin tonë.
Bumçi theksoi se krahasuar me 32 vite më parë ka hapa para në shumë aspekte por nga ana tjetër në këto 10 vite të qeverisjes së Edi Ramës është rrënuar çdo standard demokratik. Ai përmendi lirinë e cenuar të medias, drejtësinë e kapur dhe përpjekjet e vazhdueshme për të asgjësuar opozitën.
“Në një aspekt Shqipëria sot është terësisht e pakrahasueshme me 32 vite më parë, pavarësisht problemeve ky vend ka bërë hapa të jashtzakonshëm përpara në mirëqenie liri, por në të njëjtën kohë duhet të pranojmë që ai konsolidim demokratik që filloi nga vitet 2000 e mbrapa që pati rrotacion pushtetesh, që përpara 2005-ës opozitat fitonin zgjedhjet, GJK rrëzonte ligje, mediat të fuqishme kritikonin qeverinë.
Ishte një pushtet i shpërndarë në disa drejtime dhe nuk kishte kontroll, përqendrim pushteti. Sot, në vitin e 10-të të qeverisjes së Edi Ramës ky vend ka rrënuar çdo standard demokratik që gjeti në vitin 2013, dhe jo me deklaratën time por me raportet e “Freedom House”, me lirinë e medias, me treguesit e zbatimit të drejtësisë, sot Shqipëria renditet 50 vende poshte Kosovës dhe sot Rama ka më shumë pushtet se Ramiz Alia në ’91-in. E nisim me shkatërrimin e zgjedhjeve, përdorimin e krimit të organizuar, dalja e të dhënave të qytetarëve, shkojmë te kapja e drejtësisë. Si mund të shkojë para një vend pa gjykatë kushtetuese, dhunë publike ndaj mediave, e pamë dhe dy ditë para samitit. Ju rrënoj nëse guxoni të më kritikoni e tha kryeministri hapur.
Sulmi ndaj Berishës ka nisur që vjet, i është mohuar drejtimi zyrtar i PD-së. Ky sulm publik për ta asgjësuar opozitën shkoi në përshkallëzimin e së martës ku një person e goditi kryetarin e opozitës. Rama nuk njeh kufij dhe limit, duhet ta ndalojnë shqiptarët, nuk ka zgjidhje nga jashtë. Bota ka probleme shumë më të mëdha, çdo komb duhet të zgjidhë hallet e veta”-tha Bumçi per Fax News.
