Autoritetet e Kosta Rikës kanë arrestuar Alejandro Arias Monge, i njohur si “El Diablo”, një nga personat më të kërkuar në vend dhe një figurë e akuzuar për drejtimin e një organizate të fuqishme kriminale të lidhur me trafikun ndërkombëtar të drogës.
Mediat e huaja bëjnë me dije se, operacioni për kapjen e tij u zhvillua në zonën e Sarapiquí, në verilindje të San José, dhe përfundoi me një përplasje me armë mes forcave të rendit dhe grupit të tij. Gjatë operacionit mbetën të plagosur disa efektivë policie, ndërsa u arrestuan edhe persona të tjerë të dyshuar si pjesë e rrjetit kriminal.
Sipas autoriteteve, “El Diablo” dyshohet se drejtonte një organizatë transnacionale të përfshirë në trafik droge, pastrim parash dhe vepra të tjera kriminale. Ai ishte në arrati prej vitesh dhe Shtetet e Bashkuara kishin ofruar një shpërblim prej 500 mijë dollarësh për informacion që do të çonte në kapjen e tij.
Pas arrestimit, pritet të vijojë procedura ligjore për një ekstradim të mundshëm drejt SHBA-së, ku ai kërkohet për akuza që lidhen me trafikun ndërkombëtar të narkotikëve.
