Momenti i largimit i shqiptarit i cili përplasi me makinë 21- vjeçaren greke dhe e la të plagosur në vendin e ngjarjes është bërë publik në mediat greke.
Ishin dëshmitarët ata të cilët deklaruan se i riu përplasi vajzën greke, e tërhoqi zvarrë me makinë e më pas u largua.
Vajza studionte për veterinari në Universitetin Aristotelio në Selanik. E reja fatkeqe ishte me origjinë nga Chania në ishullin e Kretës.
Në mesnatë ajo hipi në avion për të shkuar në Selanik, pasi do takohej me mikeshat dhe miqtë e saj atje. Pak pas orës 1 të mëngjesit, Ema, zbriti nga avioni dhe u nis për në shtëpinë e miqve të saj.
Kur kaloi rrugën Egnatia në qendër të Selanikut , ajo u “hodh” në ajër nga një makinë. Makina drejtohej nga 26-vjeçari shqiptar.
Ndërkohë shqiptari është dorëzuar në polici. Në dëshminë e tij në Drejtorinë e Qarkullimit në Selanik për gati tre orë ai u shpreh se “jam i dërrmuar dhe shëndeti i viktimës është prioritet”, ndërsa duke u përpjekur të justifikohej u shpreh se “në lidhje me fajin e aksidentit, dua të them se nëse nuk do të kishte tentuar të kalonte rrugën Egnatia në një pikë ku nuk kishte vendkalim për këmbësorë, asgjë e pakëndshme nuk do të kishte ndodhur. Në 20 metra ka pasur një vendkalim për këmbësorë”. Krahas kësaj ai theksoi se “u largova nga vendi i ngjarjes pasi isha i frikësuar pasi nuk kam leje qëndrimi në Greqi”.
Ai ishte me precedentë të mëparshëm kriminal në fushën e narkotikëve.
