SHÇBA do të hetojë të gjitha veprimet e Policisë së Shtetit lidhur me ngjarjen e ndodhur paraditen e sotme në lezhë, ku oficeri i policisë kriminale, Saimir Hoxha, u ekzekutua me një plumb në zemër nga 21-vjeçari Aldi Rama.
Nga raportimet mësohet se SHÇBA do të marrë në pyetje kolegët e viktimës, që ishin në vendin e ngjarjes, për të mbledhur më shumë detaje lidhur me operacionin anti-drogë, që zhvillohej në zonën e Lezhës.
SHÇBA do të hetojë se cilat ishin veprimet e efektivëve që shoqëronin kolegun e tyre Saimir Hoxha dhe pse nuk reaguan kur dëgjuan të shtënat.
Gjithashtu nga raportimet mësohet se do të hetohet i gjithë plani i hartuar nga drejtuesit e Policisë lidhur me operacionin anti-drogë, kontrollet e ushtruara, numrin e efektivëve të përfshirë, ndarjen e tyre në grupe, faktin se ata operonin civilë dhe me automjete civile, planizimin e tyre.
Efektivi Hoxha u raportua se u qëllua pa paralajmërim nga 21-vjeçari Aldi Rama, i cili ndodhej në një automjet, për të cilin thuhet se u ndalua nga policia për verifikim. Ndërkohë që autori i dyshuar, pas 6 orësh ndjekjeje dhe kontrollesh policore, u tha se kishte qëlluar veten dhe u transportua drejt spitalit në gjendje kritike për jetën.
