Zjarret shkaktuan dy humbje jete gjatë stinës së verës, si dhe dogjën bimësi duke shkaktuar dëme të konsiderueshme, por kryeministri Edi Rama foli për një “rezultat përfundimtar optimist”.
Gjatë ligjërimit në bazën ajrore të Farkës, ku u fol për menaxhimin e zjarreve, kreu i qeverisë falënderoi partnerët e tij, ambasadorët Juri Kim dhe Luixhi Soreka për ndihmën që kryeministrit, i kanë dhënë Shqipërisë. Po ashtu, nuk mungoi as falenderimi për ministrin e Mbrojtjes Niko Peleshi, për të cilin tha se e ka “nderuar vendin” në luftën kundër flakëve.
“Dua të falenderoj ambasadorin e BE dhe ambasadoren e SHBA. Ky falenderim nuk është as formal dhe as diplomatik, dhe nuk është madje një falenderim për dy ambasadorët, por një falenderim për dy përfaqësues të dy fuqive të mëdha. Janë dy njerëz që menjëherë vihen në dispozicion të këtij vendi. Dua të falenderoj ministrin, sepse ka nderuar Shqipërinë në këtë moment sfidues, duke qenë ditë-natë pranë trupave”, deklaroi Rama.
Dy humbje jete
Dy persona, burrë e grua, humbën jetën nga zjarret në Lunxhëri. Ata ishin në shtëpinë e tyre në fshatin Asim Zeneli, kur flakët u afruan me shpejtësi nga zonat ku vijonin prej disa ditësh, ndërsa autoritetet treguan pafuqi për ti vënë nën kontroll. Andrea Haxhiaj humbi jetën teksa së bashku me bashkëshorten, po përpiqeshin të shuanin flakët në shtëpinë e tyre. Ndërsa e shoqja, u plagos rëndë dhe ndërroi jetë më vonë në spital.
Për këtë ngjarje, sipas raportimeve mediatike, u shkarkua nga detyra shefi i Zjarrfikëses në Gjirokastër.
Ndërkohë, kryeministri Edi Rama, gjatë fjalimit të sotëm, u mjaftua vetëm duke u shprehur “ngushëllimet publikisht dy djemve që humbën prindërit në tragjedinë për shkak të zjarrit”.
Situata e rënduar me zjarret
Shumë zona të vendit u përballën me situata të rënduara për shkak të zjarreve. Qytetarët e Fierit panë një ndotje të paprecedentë prej ditësh me radhë, ndërsa djegia e mbeturinave pushtoi qytetin me një re të dendur tymi helmues.
Zjarret u shtrinë në 12 qarqet e vendit, duke djegur për ditë të tëra bimësi e duke shkaktuar ankth te banorët, të cilët shihnin flakët tu afroheshin banesave të tyre. Nga ana tjetër, autoritetet dukeshin të papërgatitura. Pafuqinë në përballjen me zjarret e konfirmoi në një prononcim mediatik edhe kreu i zjarrfikëses së Vlorës, i cili pranoi se nuk ka burime njerëzore për të mbuluar gjithë territorin.
Në veri të vendit, armiku më i madh i zjarreve u shfaq si një bekim nga qielli për banorët e natyrën: Reshjet e shiu që bënë punën të cilët autoritetet nuk arritën. Të tjerat zona, nuk patën aq fat…
Kreu i Emergjencave Civile Haki Çako tha gjatë aktivitetit se, zjarret dogjën 33.420 hektarë kullota, pyje e shkurre si dhe 14 mijë rrënjë ullinj e pemtari.
Pavarësisht kësaj, për kryeministrin Edi Rama, rezultati përfundimtar ishte …optimist.
