Kryeministri Edi Rama, njëkohësisht edhe kryetar i PS, ka uruar sot me një postim në rrjetet sociale socialistët lidhur me ditën e themelimit të kësaj partie.
Në videon e publikuar nga Rama shfaqen Dritëro Agolli dhe Fatos Nano, por edhe shumë figura dhe ngjarje që kanë lidhje me yhvillimet politike të para vitit 1997.
Nano, lideri historik i PS, shfaqet me pranga në duar, më pas shfaqen ngjarjet e 1996, ku liderë të socialistëve dhunohen në mitingun e 28 majit, për të vijuar me ngjarjet e 1997, që ishin edhe revolucioni bolshevik, ato të 14 shtatorit 1998, kur godina e Kryeministrisë ku qëndronte Fatos Nano u sulmua pas vrasjes së liderit të Dhjetorit Azem Hajdari.
Video vazhdon me kohën kur Rama ishte Kryebashkiak i Tiranës, në mandatin e parë, ku shfaqen shembjet e ndërtimeve anash Lanës, për të vijuar më pas me historinë e PS-së, e kthyer tashmë në një Rilindje.
Duket se Rama e ka përdorur këtë ditëlindje të PS për t’i kujtuar socialistëve, atyre që për vite me rradhë quheshin progresistë, momente të vështira, pavarësisht se nga koha kur mori drejtimin e kësaj partie në 2005, i zëvendësoi shumë nga figurat qendrore të kësaj partie me Mjaftistë dhe G-99.
Ish-PPSH ndryshoi emrin në Parti Socialiste në 12 qershor 1991, ndërsa kryetar i saj u zgjodh Fatos Nano. Ndryshimi i emrit erdhi 3 muaj pas zgjedhjeve të 31 marsit 1991, ku PPSH fitoi zgjedhjet e para pluraliste, por nuk e mbajti pushtetin më shumë se 1 vit.
Postimi i Edi Ramës:
Gëzuar ditën e lindjes së forcës më të madhe politike shqiptare, Partisë Socialiste, e cila në 29 vjet ka fituar e ka humbur zgjedhje, ka pasur shkëlqime e rënie, po kurrë nuk e ka bërë gabimin e cënimit të interesit kombëtar dhe gjithnjë ka ditur të ripërtërihet, në rrugën e një ideje të madhe e të shumë punëve për Shqipërinë, që vazhdon…
https://www.facebook.com/edirama.al/videos/1714188382065863/
