Marshim absurd e ka cilësuar kryeministri Edi Rama protestën e djeshme të opozitës, duke shtuar se qeveria nuk zëvendësohet apo rrëzohet me qëndrime nga marshime.
Rama tha se megjithëse në protestën e së hënës pati një rënie të bombave Molotov, sërisht pati policë të plagosur.
“Dje ishte një manifestim i dhunshëm, u goditën institucionet dhe u vu në rrezik jeta e oficerëve të policisë.
Bombat molotov nuk janë alternativë qeverisëse. Protesta e djeshme ishte një xhiro në boshllëkun e mendimit. Situata të tilla dëmtojnë imazhin e vendit, i bëjnë keq shqiptarëve dhe Shqipërisë. E vetmja gjë që nuk preket është qeveria dhe shumica qeverisëse”, theksoi Rama.
Ai tha se në gjyq për protestën e së shtunës janë njerëz të zakonshëm, të manipuluar për të bërë akte dhune, ndërkohë që manipulatorët pasi mbarojnë punë me mikrofonat, shkojnë e flenë në shtëpitë e tyre.
“Si mund të zëvendësohet partia, që është një alternativë për t’u votuar, me një trup pa kokë që vjen vërdallë nëpër Tiranë apo çon njerëz në kryqëzime rrugësh dhe bën dëm.
Shpreh mirënjohjen më të thellë për gjithë sakrificën që bëjnë njerëzit me uniform. Shpreh mirënjohjen për ata gazetarë dhe operatorë që për të bërë detyrën e tyre duhet të qëndrojnë në zona të rrezikshme, si këto që hidhen bomba molotov.
Molotovët janë mjete luftarake, shërbejnë për të hedhur tanket në erë, janë përdorur në luftën e Spanjës”, tha Rama.
