Armë dhe municione janë gjetur në disa banesa gjatë një kontrolli blic nga policia në Durrës, Tiranë, Krujë, Fushë-Krujë dhe Elbasan. Kontrollet po kryehen, teksa uniformat blu janë në kërkim të autorëve të atentatit të ndodhur katër ditë më parë ndaj prokurorit Arjan Ndoja tek mbikalimi i Shkozetit, ku mbeti i plagosur prokurori, shoferi i tij Andi Maloku, dhe Landi Muharremi i njohur si “Rrumi”.
Mësohet se gjatë kontrollit në banesat e personave të dyshuar si autorë janë gjetur armë dhe municione. Megjithatë, mësohet se ende nuk ka një emër konkret edhe pse janë shoqëruar në polici mbi 20 persona.
***
Rreth orës 16:30 të ditës së premte Arjan Ndojës iu bë atentat te mbikalimi i Shkozetit në Durrës. Prokurori ishte në automjet me një person me precedentë penalë, të njohur si i “forti i Sukthit”, Landi Muharremi nga Sukthi, dhe me Andi Malokun, ish-punonjës i policisë në komisariatin e Krujës, aktualisht shofer i prokurorit.
Makinës ‘Benz’ me targë AA 333 ZD (që rezulton në pronësi të Fadil Çallikut) dhe në përdorim nga Prokurori Ndoja, iu bë atentat pranë mbikalimit të Shkozetit kur u qëllua ndaj tyre me breshëri automatiku nga një tjetër automjet, duke i lënë të tre të plagosur.
Pas breshërisë së tetë plumbave makina doli nga rruga, ndërsa të plagosurit u transportuan me makinë private, një ‘Benz CLS’ që dyshohet se ishin të njohur të të plagosurve. Më rëndë ndodhet shoferi Andi Maloku 30 vjeç, i cili ka marrë një plumb në gjoks dhe ndodhet në spitalin e Traumës në Tiranë. Ndërsa prokurori Arjan Ndoja dhe Landi Muharremi, që njihet me disa emra ndodhen jashtë rrezikut për jetën.
***
Prokuroria e Krimeve të Rënda, e cila po heton mbi motivet dhe autorët e atentatit ka ngritur pistat e para. Ka dyshime se atentati të ketë qenë i porositur dhe pistat kanë lidhje me ngjarje kriminale dhe ato që lidhen me dosjet e pronave.
Prokurorët thanë se kanë marrë në cilësinë e provës materiale të gjitha dosjet e fundit që prokurori Ndoja ka marrë në shqyrtim. Dëshmia e tij është siguruar pak minuta pas ngjarjes, por prokurorët thanë se do ta ri-pyesin. Prokurorët shprehen se janë në pritje të përmirësimit të gjendjes shëndetësore të Andi Malokut, shoferit të prokurorit dhe Landi Muharremit, mikut të tij, për të marrë dëshmi në imtësi dhe të dhëna që do të shërbejnë për hetimin.
LEXO EDHE:
FOTOT/ Si po ruhet pas atentatit prokurori Ndoja, kush e vizitoi sot në spital …
