Janë publikuar pamjet nga brenda autobusit të Green Line, i cili u përfshi në një aksident pasditen e kësaj të premte në kryeqytet, në afërsi të Gjykatës së Tiranës.
Sipas raportimeve paraprake mjeti ka pësuar një defekt dhe si pasojë ka humbur kontrollin duke devijuar nga rruga.
Si pasojë e aksidentit raportohet për disa persona të plagosur, ndërsa nuk dihet ende rrethanat e plota të ngjarjes.
Siç mund të shihet dhe në fotot e mëposhtme, xhami i brendshëm i autobusit është thyer, si pasojë e përplasjes, ndërsa rasti ka shkaktuar panik te pasagjerët.
Ndërkohë kujtojmë se autobusët e Green Line, janë mjete të kompanisë së Nadir Çaushollit, të cilat janë bërë shpesh protagonistë të aksidenteve rrugore në rrugët e kryeqytetit.
Aksidente që në disa raste kanë qenë me bilanc të rëndë si në persona të lënduar ashtu dhe dëme materiale.
Një prej tyre ishte ai 27 shkurtit 2023 në zonën e njohur si “Shallvaret”, ku urbani i linjës së Unazës shkaktoi një aksident masiv, duke përplasur disa makina e duke shkaktuar një duzinë me persona të plagosur. Pamjet e marra nga një kamera sigurie treguan si autobusi me shpejtësi të pazakontë përplasi një mjet tip “Audi” e më tej u shkaktua një aksident zinxhir.
Hetimet nxorën përgjegjës drejtuesin e urbanit i cili u arrestua për veprën penale të shkeljes së qarkullimit rrugor, ndërsa më pas i lirua nga gjykata që zbuti masën. Shefi i trafikut urban në Tiranë, Taulant Gjoka tha pas aksidentit se qëndron hipoteza që drejtuesi i autobusit mund të ketë pasur një patologji fizike.
Aksidenti i Shkurtit i kompanisë së Nadir Caushollit u parapri nga një tjetër ngjarje me disa të plagosur. Në 22 prill 2022, ku një autobus i shoqërisë “Green Line” doli nga rruga dhe përfundoi në skarpatet e lumit Lanë, së bashku me pasagjerët, në zonën e quajtur “Pallatet Agimi”, shumë pranë ish-Bllokut. Të paktën nëntë persona mbetën të lënduar, ndërsa çështja u pushua nga gjykata e Tiranës, pasi të dëmtuarit vendosën të tërhiqeshin nga ankimi.
Të tjera aksidente me bilanc jo kaq të rëndë kanë ndodhur më pas në kryeqytet, me protagonist autobusët e “Green Line”.
