Nga Boldnews.al
Aksidenti masiv i të Hënës në Tiranë, ku u përfshi një autobus i linjës së Unazës dhe 11 makina, me të paktën 9 të plagosur, risolli në vëmendje një tjetër incident që ndodhi me mjetet e transportit urban të Nadir Çaushollit rreth një vit më parë.
Në 22 prill 2022, një autobus i shoqërisë “Green Line” doli nga rruga dhe përfundoi në skarpatet e lumit Lanë, së bashku me pasagjerët, në zonën e quajtur “Pallatet Agimi”, shumë pranë ish-Bllokut.
Qytetarët që u gjendën në vendngjarje dhe forcat e Policisë u angazhuan për dhjetra minuta për të nxjerrë pasagjerët nga mjeti urban, i cili kishte marrë me vete dhe kishte zënë përfund edhe një veturë.
Kryebashkiaku i Tiranës, Erion Veliaj, i cili gjendet kudo ku ka kamera mediatike, u shfaq mbrëmjen e 22 Prillit 2022, duke deklaruar se autobusi i dëmtuar do të qëndrojë mbi Lanë, si një instalacion që do të dëshmojë për pasojat e papërgjegjshmërisë në drejtimin e makinave.
Fjalët e Veliajt i mori era. Autobusi i Çaushollit u hoq nga vend-ngjarja dhe u dërgua për ekspertizë pranë autoriteteve hetimore.
Prokuroria e Tiranës zhvilloi hetime për aksidentin dhe ngriti akuzë penale ndaj drejtuesit të autobusit për “plagosje të lehtë me dashje” në dëm të disa personave.
Çështja shkoi në gjykatën e Tiranës. Por, sapo nisi procesi gjyqësor, të dëmtuarit vendosën të tërhiqeshin nga ankimi.
Është e paqartë se përse të plagosurit e aksidentit vendosën të harronin dëmtimet e traumat e pësuara dhe të tregoheshin mirëkuptues me kompaninë e Nadir Çaushollit.
Megjithatë, Kodi Penal parashikon që, në rastet e veprave të lehta penale, nëse të dëmtuarit heqin dorë nga ankimi, gjykimi pushohet.
Kështu ndodhi edhe me çështjen e “autobusit të Lanës”.
Gjykata e Tiranës u detyrua të pushojë gjykimin penal për shkak të tërheqjes së ankimit të të dëmtuarve, duke lënë rastin pa fajtor.
