Agron Xhafa, 63 vjeç, shoferi i autobusit që shkaktoi aksidentin në Tiranë këtë të Hënë, është arrestuar.
Lajmin e konfirmoi shefi i trafikut urban në Tiranë, Taulant Gjoka.
Ai bëri me dije se akuza e ngritur ndaj shoferit është ajo e shkeljes së rregullave të qarkullimit rrugor.
“E kemi versionin, për ne është shkelje e rregullave të qarkullimit rrugor nga drejtuesi i autobusit, i cili është arrestuar nga policia. Është vendosur masa e arrestit në kushtet e flagrancës për drejtuesin e autobusit. Pra aktualisht që flasim, ai është i dyshuar si shkaktar i aksidentit rrugor. Dhe ka dyshime të arsyeshme për shkelje që janë të dukshme. Pastaj, hipotezat se shkelja e rregullave ka ardhur si pasojë e patologjisë fizike që ai pretendon, apo amnezës mjekësore për të cilën ne nuk kemi dijeni, apo si rezultat i një gabimi tjetër…”, tha Gjoka në emisionin “Opinion”.
Sipas Gjokës, ka dyshime se në mënyrë të pavetëdijshme, shoferi mund të ketë shtypur pedalen e gazit.
“Ka një trajektore që nuk tregon asnjë reagim të drejtuesit të autobusit, godet fillimisht “Audin” e cila më pas si shkak i përplasjes godet mjetin “Benz”, e “Benzi” më pas auto-veturën tjetër. Pra “Benzi”godet “Porche-in”, jo “Audi”, pra përplasje treshe dhe pastaj “Porche” për inerci përfundon në korsi të shërbimit publik. Këtu duket sikur rritet shpejtësia e autobusit një moment, çka tregon se edhe mund të vërtetohet pretendimi i tij për një patologji fizike në momentet e para. Që mund të ketë humbur vetëdijen…”, tha ai.
- Mund të ketë patur moment përgjumjeje?
Taulant Gjoka: Mund të ketë shtypur pedalen e gazit më shumë sepse shpejtësia e goditjes te “Porche” është më e lartë se sa shpejtësia e goditjes tek “Audi”.
- Pra, mund të ketë pasur gjendje të fikti po themi...
Taulant Gjoka: Qëndron hipoteza për shkeljen e rregullave të qarkullimit rrugor për një patologji fizike. Hetimet vijojnë.
10 automjete u përfshinë në një aksident të pazakontë paraditen e kësaj të Hëne në Tiranë. Për shkaqe ende të paqarta, shoferi i linjës së autobusit “Green Line” në pronësi të Nadir Çaushollit, doli nga korsia e tij, duke marrë para disa automjete. Dhjetra persona mbetën të plagosur. Nëntë prej tyre përfunduan në spital, për të marrë ndihmë mjekësore.
Vetë shoferi është shprehur se nuk ka qenë i vetëdijshëm dhe se nuk e mban mend sesi ka ndodhur ngjarja.
Lexo edhe:
VIDEO e re/ Si autobusi i Çaushollit mori përpara mjetet e ndaluara në semafor
