Franca ka reaguar ndaj pretendimeve të Rusisë se Ukraina po përpiqet të sigurojë një armë bërthamore ose një “bombë të ndyrë” me ndihmën e Londrës apo Parisit, duke i cilësuar ato si të pabaza dhe pjesë e dezinformimit rus.
Deklarata ruse u bë nga Shërbimi i Inteligjencës së Jashtme të Rusisë (SVR), me rastin e katërvjetorit të nisjes së luftës në Ukrainë. Sipas SVR-së, Britania dhe Franca do të besonin se Kievi mund të përmirësonte pozitat e tij nëse do të zotëronte një armë bërthamore ose të paktën një të ashtuquajtur “bombë të ndyrë”.
Drejtoresha e komunikimit në Ministrinë franceze të Mbrojtjes, Olivia Penichou, tha se deklarata është e pabazuar dhe është shpërndarë nga propagandistë rusë në rrjete sociale dhe nga disa media të huaja.
Ajo theksoi se Federata Ruse përdor shpesh dezinformimin për të krijuar mosbesim ndaj Francës dhe partnerëve të saj që mbështesin Ukrainën, duke e cilësuar këtë rast si një shembull tipik.
Zyrtarët francezë nënvizuan se Parisi respekton plotësisht angazhimet ndërkombëtare, përfshirë ato që burojnë nga Traktati për Mospërhapjen e Armëve Bërthamore.
